ބިންވެރިޔާ ސްކީމުގެ ދަށުން ގުޅީފަޅުން ގޯތި ލިބުނު މީހުންނަށް, ގޯތި ލިބޭ ސަރަހައްދުތައް އަލުން ކަނޑައެޅުމަށް ގުރުއަތު ނަގައިދޭނީ، ސަރުކާރުގެ އޮފިޝަލުންކަން ހާމަކުރުމާއި އެކު ބައެއް ފަރާތްތަކުގެ ނުރުހުން ސަރުކާރަށް އަމާޒު ވެއްޖެއެވެ.

ގިރާވަރުފަޅާއި ގުޅީފަޅުން ގޯތި ލިބިފައިވާ މީހުންނަށް، ގޯތި ލިބުނު ސަރަހައްދުތައް ކަނޑައަޅައި ބިމުގެ ރަޖިސްޓްރީވެސް ދޫކޮށްފައި ވަނިކޮށް، މިހާރުގެ ހައުސިން މިނިސްޓްރީން ވަނީ އެ ދެ ރަށުގެ ލޭންޑް ޔޫސް ޕްލޭނަށް ބަދަލުތަކެއް ގެނެސް އަލުން، ގޯތި ލިބުނު މީހުންނަށް ގޯތި ލިބޭ ތަން ކަނޑައެޅުމަށް ގުރުއަތުލުން ބޭއްވުމަށް ނިންމާފައެވެ. ލޭންޑް ޔޫސް ޕްލޭނަށް ތިން ފަހަރަށް ބަދަލު ގެނެސްފައި ވާއިރު، އެންމެ ފަހުން ގެނައި ބަދަލުތަކާއި އެކު، އެޕްލޭން އާއްމުކުރީ ހޯމަ ދުވަހުގައެވެ.

ގޯތި ލިބުނު މީހުންގެ ތެރެއިން ވަރަށް ގިނަ އަދަދެއްގެ މީހުން މިއަދު ގުރުއަތު ނެގުމަށް، ގޮސްފައި ދަރުބާރުގެއަށް ދިޔައެވެ. އެހެން ނަމަވެސް ގުރުއަތު ނެގުން ބޭއްވުމަށް ކަނޑައަޅާފައިވާ ތަނަށް ދިޔުމުން، ފޮށި ކަރުދާސްކޮޅު ނަގާނީ ހައުސިންގ މިނިސްޓްރީގެ އޮފިޝަލުން ކަން އެނގުމުން ބައެއް މީހުން ވަނީ އެކަމާއި މެދު ހިތް ހަމަނުޖެހުން ފާޅުކޮށް، އެކަމަކީ، ރަނގަޅު ސަރަހައްދުތައް ވަކި ބަޔަކަށް ދިނުމަށް ހިންގާ އޮޅުވާލުމެއް ކަމުގައި ތުހުމަތުކޮށްފައެވެ. އަދި ގުރު ނަގަން އެތައްހާސް ބަޔަކު، ވަޒީފާތަކުގެ މަސައްކަތް ދޫކޮށް އައުމުން އެގޮތަށް އެކަން ވުމަކީ ބަލައި ގަނެވޭނެ ކަމެއް ނޫންކަމުގައިވެސް ބައެއް ފަރާތްތަކުން ވަނީ ބުނެފައެވެ.

ގިރާވަރުފަޅާއި ގުޅިފަޅުން ގޯތި ލިބުނު މީހުންނަށް ގޯތި ލިބޭ ތަން ކަނޑައެޅުމަށް ގުރުއަތު ނަގާ މިއީ ދެވަނަ ފަހަރެވެ. ދަރުބާރުގޭގައި ގުރުއަތުލުން ކުރިޔަށް ދާއިރު، ގުރުއަތު ނަނގަމުންދާ ތަރުތީބުން، ޕޯޓަލްއަށް އެ މައުލޫމާތު ވަގުތުން ގެންދަނީ އަޕްލޯޑް ކުރަމުންނެވެ.

ބިންވެރިޔާ ސްކީމްގެ ދަށުން މާލެ ސަރަހައްދުން ގޯތި ދޫކުރުމަށް ހުޅުވާލި ފުރުޞަތުގައި 9000 ވުރެ ގިނަ މީހުން ޝަރުޠު ހަމަވެ އެ އެންމެންނަށްވެސް ގޯތި ދިނުމަށް ކުރީ ސަރުކާރުން އޮތީ ނިންމާފައެވެ.