ސަރުކާރުން ރައްޔިތުންގެ މަޖިލީހަށް ހުށައެޅި، ސަޕްލިމެންޓްރީ ބަޖެޓް، ސަރުކާރުން ހުށައެޅި ގޮތަށް އެއްވެސް ބަދަލެއް ނުގެނެސް ބަޖެޓް ކޮމިޓީން ފާސްކޮށްދީފިއެވެ.

ސަރުކާރުން ރައްޔިތުންގެ މަޖިލީހަށް ހުށައެޅި ސަޕްލިމެންޓްރީ ބަޖެޓްގެ އަދަދަކީ، 5.1 ބިލިއަން ރުފިޔާއެވެ. މިބަޖެޓަކީ، މިއަހަރަށް ރައްޔިތުންގެ މަޖިލީހުން ފާސްކޮށްދިން، 49.8 ބިިލިއަން ރުފިޔާއިން ނުފުދޭތީ ސަރުކާރުން ހުށައެޅި ބަޖެޓެކެވެ.

ސަޕްލިމެންޓްރީ ބަޖެޓުގައި އެންމެ ބޮޑު އަދަދެއް ހިމަނާފައި ވަނީ ޕީއެސްއައިޕީ މަޝްރޫޢުތަކަށެވެ. ޕީއެސްއައިޕީ މަޝްރޫޢުތަކަށް 2 ބިލިއަން ރުފިޔާ ހިމަނާފައިވެއެވެ. ދެވަނައަށް އެންމެ ބޮޑު އަދަދެއް ހިމަނާފައި ސަބްސިޑީއަށެވެ. ސަބްސިޑީތަކަށް 1 ބިލިއަން ރުފިޔާ ވަނީ ހިމަނާފައެވެ. މީގެ އިތުރުން ކޮންޓިންޖެންސީ ބަޖެޓަށް 600 މިލިއަން އަދި ސަރުކާރު ޙިއްޞާވާ ކުންފުނިތަކަށް 441 މިލިއަން ދިނުމަށް ވަނީ ހިމަނާފައެވެ. އަދި އާސަންދަ އާއި އެންސްޕާގެ ދަށުން، ބޭސްފަރުވާގެ އެހީ ދިނުމަށް 262.6 މިލިއަން ރުފިޔާ ހިމަނާފައިވެއެވެ. 

ބަޖެޓް ކޮމިޓީން، ސަޕްލިމެންޓްރީ ބަޖެޓް ފާސްކުރުމުން ބަޖެޓާއި ގުޅޭ ގޮތުން އެންމެ ފަހުގެ ނިންމުން ނިންމާނީ ރައްޔިތުންގެ މަޖިލީހުގެ ތަޅުުމުގައެވެ. ސަޕްލިމެންޓްރީ ބަޖެޓެއް ސަރުކާރުން ހުށައެޅި އިރު، މިއަހަރަށް ފާސްކުރި ބަޖެޓުން ކުރި ޚަރަދު ތަފްޞީލެއް ސަރުކާރުން ހާމައެއް ނުކުރެއެވެ. އަދި ބަޖެޓް ދިރާސާކުރި ކޮމިޓީއަށްވެސް ވަނީ އެމައުލޫމާތު ސިއްރުކޮށްފައެވެ.