ފަސޭހަފުޅު ވަގުތެއްގައި، އިނގިރޭސި ރަސްގެފާނު ޗާލްސް 3 ވަނަ ދިވެހިރާއްޖެއަށް ޒިޔާރަތެއް ކުރެއްވުމަށް، ރައީސުލްޖުމްހޫރިއްޔާގެ ނައިބު ޙުސައިން މުޙައްމަދު ލަޠީފް ރަސްގެފާނަށް ދަޢުވަތު އަރުއްވައިފިއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ފަރާތްޕުޅުން ރަސްގެފާނަށް މިދަޢުވަރު އެރުއްވީ، ކޮމަންވެލްތުގެ އިސްވެރިންގެ ޝަރަފްގައި ރަސްގެފާނު ޗާލްސް އާއި ރާނީ ކެމީލާ ދެއްވި ޖާފަތުގައި ބައިވެރިވެވަޑައިގެން ރަސްގެފާނާއި ސަލާމް ކުރައްވައި ދެއްކެވި ވާހަކަފުޅުގައެވެ.

ރައީސުލްޖުމްހޫރިއްޔާގެ ނައިބު ދެއްކެވި ވާހަކަފުޅުގައި ވަނީ، މިއަހަރުގެ ބައްދަލުވުމުގެ ކާމިޔާބު ބައްދަލުވުމަކަށް ވެގެން ދިޔަކަމާއި، އިންތިޒާމްތައް ރަނގަޅުކަން ފާހަގަކުރައްވާފައެވެ. 

ރައީސުލްޖުމްހޫރިއްޔާގެ ނައިބު، އަލްއުސްތާޛު ޙުސައިން މުޙައްމަދު ލަޠީފު މިވަގުތު ހުންނެވީ، ސަމޯއާގައި މިހާރު ކުރިއަށްދާ ކޮމަންވެލްތު ހެޑްސް އޮފް ގަވަރމަންޓް މީޓިންގް (ޗޮގަމް 2024)ގައި ބައިވެރިވެވަޑައިގެންނެވުމަށްޓަކައި، ސަމޯއާގެ ވެރިރަށް އަޕިއާއަށް ވަޑައިގެންނެވެ.

ހުސްވި ޑިސެމްބަރު، 2023، ގައި ދުބާއީގައި ބޭއްވި ކޮޕް-28 ގެ ހަވާސާގައި، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒާއިވެސް، ރަސްގެފާނު ޗާލްސްއާ ބައްދަލުވެވަޑައިގެންނެވިއެވެ.

މިހާތަނަށް ދިވެހިރާއްޖެއަށް ވަޑައިގެންނެވި އިނގިރޭސި ރަސްކަމުގެ އެންމެ އިސްވެރިއަކީ، ރަސްގެފާނު ޗާލްސް 3ގެ މަންމާފުޅު، އަވަހާރަވެފައިވާ ރާނީ ކްއީން އެލިޒަބަތު 2 ވަނަ އެވެ. 

އެކަމަނާ ރާއްޖެ ވަޑައިގަތީ ކަނޑުމަގުން، ރޯޔަލް ޔޮޓް ބްރިޓޭނިއާގައި، 1972 ވަނަ އަހަރުގެ މާރިޗު މަހުގެ 13ވީ ހޯމަ ދުވަހުގައެވެ. މާލޭގެ އިތުރުން އެކަމަނާ އައްޑުއަށްވެސް ވަޑައިގެންނެވިއެވެ.