ހުކުރުދުވަހުގެ ރޭ އިޒްރާއީލުން އީރާނަށް ދިން ހަމަލާތައް ދިވެހިރާއްޖެއިން ކުއްވެރިކޮށްފިއެވެ. 

އިޒްރޭލުގެ ހަމަލާތައް ކުއްވެރިކޮށް ދިވެހި ޚާރިޖިއްޔާއިން ނެރުނު ނޫސްބަޔާނުގައި ވިދާޅުވެފައި ވަނީ، އިރާނުގެ އަސްކަރީ މަރުކަޒުތަކަށް އަމާޒުކޮށް ބުނެ އިޒްރާއީލުން ދިން ހަމަލާއަކީ ބައިނަލްއަގުވާމީ ގާނޫނުތަކާއި ގަވާއިދުތަކާ ހިލާފަށް ދިން ހަމަލާއެއް ކަމަށާއި، ދިވެހި ސަރުކާރުން އެހަމަލާތައް ކުއްވެރި ކުރާ ކަމަށެވެ. ޚާރިޖިއްޔާގެ ބަޔާނުގައި އިތުރަށް ބުނެފައި ވަނީ، މެދު އިރުމަތީގައި ހިނގަމުންދާ ހަނގުރާމަ ފުޅާވިޔަ ނުދީ ސުލްޙަ ޤާއިމްކުރުމަށް މަސައްކަތް ކުރަންޖެހޭ ކަމަށެވެ.

ބައިނަލްއަޤުވާމީ ރިޕޯޓްތައް ބުނާ ގޮތުގައި އިޒްރާއީލުން ވަނީ، އީރާނުގެ އަސްކަރީ 20 މަރުކަޒަކަށް ހަމަލާދީފައެވެ.

މިހާރު ފެށިގެން އުޅޭ ހަމަނުޖެހުންތަކުގައި އެންމެ ފުރަތަމަ އިޒްރޭލުން ސީރިޔާގައި ހުރި އީރާނުގެ އެމްބަސީއަށް ހަމަލާދީ އީރާނުގެ އަސްކަރިއްޔާގެ އިސް އޮފިސަރަކު ވަނީ އަވަހާރަކޮށްލާފައެވެ. އޭގެ އިތުރުން، ހަމާސްގެ ލީޑަރު އިސްމާޢީލް ހަނިއްޔާ އަވަހާރަކޮށްލީވެސް އޭނާ އީރާނުގައި ހުންނަވަނިކޮށް އިޒްރޭލުންނެވެ. މީގެ އިތުރުން އީރާންގެ ރައީސް، އިބްރާހީމް ރައީސީ ދަތުރުކުރެއްވި ހެލިކޮޕްޓަރުވެއްޓި އޭނާ އަވަހާރަވުމުގައިވެސް އިޒްރޭލުގެ އަތެއް ވެދާނެކަމަށް ތުހުމަތުކުރެވިފައިވެއެވެ.

އެ ހަމަލާތަކުގެ ބަދަލު ހިފުމެއްގެ ގޮތުން އީރާނުން، މި އޮކްޓޫބަރު މަހުގެ ފުރަތަމަ ދުވަހު ވަނީ އިިޒްރޭލު އަސްކަރ މަރުކަޒުތަކަށް 200 ވުރެ ގިނަ ރޮކެޓާއި ބެލެސްޓިކް މިސައިލް އަދި ހައިޕަރ ސުޕަރސޮނިކް މިސައިލުންނާއި ޑްރޯނުން ހަމަލާތައް ދީފައެވެ. އެހަމަލާތަކުގައި އިޒްރޭލުން ނަވަތިމް އެއާ ބޭސް މުޅިން ހަލާކުކޮށްލިއެވެ.