މާލޭ ދެކުނު ފަރާތު ފަޅުތެރެއިން އިއްޔެ ބަޔަކު ވިހަ ގަދަ ކަނޑު ހަރުފައެއް ހިފައިފިއެވެ.

ބަނޑުދަށުގައި ރީނދޫކުލައިގެ ރޮނގެއް ހުންނަ މި ކަނޑު ހަރުފަ ފެނިފައި ވަނީ، ހުކުރު ދުވަހު ހެނދުނު، މާލޭ ދެކުނު ފަރާތު ފަޅު ތެރެއިން ލޯންޗު ފަހަރު އަޅާފައި އޮންނަ ސަރަހައްދުންނެވެ. މިކަނޑު ހަރުފަ ފެނުނު މީހުން ވަނީ، އޭތި ހިފައި ހަންބުރިއަކަށް ލުމަށް ފަހުގައި، މާލޭގެ ދެކުނު ފަރާތުން ވާދޫ ކަނޑު ތެރެއަށް ދޫކޮށްލާފައެވެ.

މިކަނޑު ހަރުފައަކީ، މޫދުގައި ދިރިއުޅޭ މިފަދަ ބާވަތްތަކުގެ ތެރެއިން އެންމެ ވިހަގަދަ އެއް ބާވަތްކަމުގައި، ކަނޑުތަކުގެ ދިރުންތަކާއި ގުޅޭ މައުލޫމާތު ޝާޢިއުކޮށްފައިވާ ވެބްސައިޓްތަކުގައި ބުނެފައި ވެެެއެވެ. މިހަރުފައަށް ދީފައިވާ ނަމަކީ، ޔެލޯ ބެލީޑް ސީ ސްނޭކްއެވެ.

މީގެ ކުރިންވެސް ހަމަ މިބާވަތުގެ ކަނޑު ހަރުފައެއް 2019 ވަނަ އަހަރު، ހދ. މަކުނުދޫ ކައިރިން ފެނިފައިވެއެވެ.

މިބާވަތުގެ ކަނޑު ހަރުފައަކީ، އިންޑިއާކަނޑާއި ޕެސިފިކް ކަނޑުގެ ސަރަހައްދުތަކުގައި އުޅޭ އެއްޗެކެވެ.