މިފެށޭ ނޮވެމްބަރު މަހުންފެށިގެން އަލުން ޑޮމެއިން ނަމްބަރުތައް ދޫކުރަން ފަށާނެ ކަމުގައި ޓްރާންސްޕޯޓް މިނިސްޓްރީން ވިދާޅުވެއްޖެއެވެ.

އެމިނިސްޓްރީން މިކަން ހާމަކުރައްވައި ނެރުއްވި ބަޔާނުގައި ވިދާޅުވީ، ޑޮމެއިން ނަމްބަރުތައް ދޫކުރުމަށް އެކަށައަޅާފައިވާ އުސޫލުތައް މިހާރު އިސްލާޙްކޮށްފައިވާކަމަށެެވެ. އަދި ޑޮމެއިން ނަމްބަރުތައް ދޫކުރުން ހުއްޓާލީ، ކުރީ ސަރުކާރުގައި، މިދިޔަ އަހަރުގެ އޮގަސްޓް މަހުގައެވެ. ޑޮމައިން ނަމްބަރުތައް ދޫކުރުން ހުއްޓާލީ، އެއްގަމުގައި ދުއްވާ އުޅަނދުތަކުގައި ބޭނުންކުރާ ޑޮމެއިން ނަންބަރުތަކާ ގުޅޭ ގިނަ މައްސަލަތަކެއް ފެންމަތިވުމާއެކުގައި ރައީސުލްޖުމްހޫރިއްޔާގެ އޮފީހުން އަންގަވައިގެންނެވެ. 

ޓްރާންސްޕޯޓް މިނިސްޓްރީން ވިދާޅުވީ، މި ޚިދުމަތަކީ، ދިވެހިންގެ މެދުގައި އަދި ވަކިން ޚާއްޞަކޮށް ޒުވާނުންގެ މެދުގައި، ނުހަނު މަޤުބޫލުކަން ލިބިފައިވާ، އަދި ޑޮމެއިން ގަތުމަށާއި ގުޅުންހުރި ޚިދުމަތް ހޯދުމަށް އެފަރާތްތަކުން ބޮޑެތި ހޭދަތައްވެސް ކޮށްފައިވާ ޚިދުމަތެއް ކަމަށާއި، އެހެންވެ ޚިދުމަތް އަލުން ފެށުމަށްޓަކައި މައްސަލަތަކަށް އަވަސް ޙައްލެއް ހޯދުމަކީ މި ސަރުކާރުން ވަރަށް ޙާއްޞަ އަހައްމިއްޔަތުކަމެއް ދީގެން ކުރިޔަށްގެންދާ މަސައްކަތެއް ކަމަށެވެ. 

އަދި އަލުން މި ޚިދުމަތް ފެށުމުގައި ކުރިމަތިވެފައިވާ އެންމެބޮޑު ގޮންޖެހުމަކީ، ވޭތުވެދިޔަ ތަނުގައި ޑޮމެއިންގެ ރެކޯޑުތައް ހަރުދަނާ ގޮތެއްގައި މިނިސްޓްރީގައި ބެލެހެއްޓިފައި ނެތުމާއި، ޚިދުމަތް ފޯރުކޮށްދިނުމުގައި ޢަމަލުކުރާނެ ހަރުދަނާ އުޞޫލުތަކެއް އެކުލަވާލާފައި ނެތުން ކަމުގައިވެސް އެމިނިސްޓްރީން ވަނީ ވިދާޅުވެފައެވެ. 

ޓްރާންސްޕޯޓު މިނިސްޓްރީން ވިދާޅުވީ، އަލަށް ގެެނެވޭ  ބަދަލުތަކާއެކު، އަލުން ޑޮމެއިންގެ ޚިދުމަތްތައް ފަށާއިރު، މިހާރު ދިމާވެފައިވާ ގޮންޖެހުންތަކަށް ޙައްލު ހޯދުމުގެ ގޮތުންނާއި އަދި ޚިދުމަތް ފޯރުކޮށްދިނުމަށް ލުއި ފަސޭހަ ކުރުމަށްޓަކައި ޢަމަލުކުރަންޖެހޭ އުޞޫލުތައް ވެސް އިޞްލާޙު ކުރެވިގެންދާ ކަމަށެވެ. މީގެ އިތުރުން، ޑޮމެއިންގެ ޚިދުމަތް ފޯރުކޮށްދިނުމުގައި ދޫކުރެވޭ އެންމެހައި ލިޔެކިޔުންތަކަކީ ސެކިއުރިޓީ ފީޗަރސްތައް އެކުލެވޭ ލިޔެކިޔުންތަކަށް ބަދަލުވެގެންދާނެކަމުގައިވެސް އެމިނިސްޓްރީން ވިދާޅުވިއެވެ.

މީގެ އިތުރުން، އެ މިނިސްޓްރީގެ މަޤްޞަދަކީ، ޑޮމެއިން ނަންބަރުތަކާ ގުޅިގެން ދިމާވެފައިވާ މައްސަލަތަކަށް ޤާނޫނާއި ގަވާއިދުގެ ތެރެއިން ލުއިފަސޭހަ ގޮތެއްގައި ޙައްލު ހޯދައިދީ، ރައްޔިތުންގެ އިތުބާރު ލިބިފައިވާ ޚިދުމަތަކަށް ހެދުން ކަމުގައިވެސް ޓްރާންސްޕޯޓް މިނިސްޓްރީން ވަނީ ވިދާޅުވެފައެވެ.