ރައްޔިތުންގެ މަޖިލީހުން މިއަހަރަށް ފާސްކޮށްދިން 49.8 ބިލިއަން ރުފިޔާގެ ބޮޑު ބަޖެޓު ހުސްވެ، އިތުރު 5 ބިިލިއަން ރުފިޔާގެ ބަޖެޓެއް ސަރުކާރުން ރައްޔިތުންގެ މަޖިލީހަށް ހުށައަޅުއްވައިފިއެވެ.

ރައްޔިތުންގެ މަޖިލީހަށް މިއަދު ބަޖެޓު ހުށައަޅުއްވާފައި ވަނީ، ފިނޭންސް މިނިސްޓަރ މޫސާ ޒަމީރެވެ. މިނިސްޓަރ ޒަމީރު ވިދާޅުވީ، ސަޕްލިމެންޓްރީ ބަޖެޓެއް ހުށައަޅަން ޖެހުނީ، ކުރީ ސަރުކާރުން ބަޖެޓް ހުށައެޅުމުގައި ޢަމަލުކޮށްފައިވާ ގޮތުގެ ސަބަބުން ކަމަށެވެ. މިގޮތުން، މިއަހަރުގެ ބަޖެޓަކީ ކުރީ ސަރުކާރުން ހުށައެޅި ބަޖެޓެއް ކަމަށާއި، މިސަރުކާރުން ގެންނަން ބޭނުންވި މާލީ ރިފޯމްތަަކަށް ބަޖެޓުގައި ކުރީ ސަރުކާރުން އަލިއަޅުވާލާފައި ނުވާކަމަށެވެ.

މިނިސްޓަރ ޒަމީރު ބަޖެޓު ހުށައަޅުއްވައި ދެއްވަމުން ވިދާޅުވީ، ސަޕްލިމެންޓްރީ ބަޖެޓުގެ ޖުމުލަ އަދަދަކީ، ފަސް ބިލިޔަން އެއް ސަތޭކަ ނަވާރަ މިލިޔަން ފަސްލައްކަ އަށްހާސް އެއް ސަތޭކަ ނަވާވީސް ރުފިޔާ ކަމަށެވެ. އަދި ސަޕްލިމެންޓްރީ ބަޖެޓުގައި ކަނޑައަޅާފައި ވަނީ، ސަރުކާރުގެ ރިކަރަންޓް ޚަރަދަށް 1.5 ބިލިއަން ރުފިޔާ އާއި ކެޕިޓަލް ޚަރަދަށް 3.5 ބިލިޔަން ރުފިޔާކަމުގައިވެސް މިނިސްޓަރ މޫސާ ޒަމީރު ވިދާޅުވިއެވެ.

ސަޕްލިމެންޓްރީ ބަޖެޓުގައި އެންމެ ބޮޑު އަދަދެއް ހިމަނާފައި ވަނީ ޕީއެސްއައިޕީ މަޝްރޫޢުތަކަށެވެ. ޕީއެސްއައިޕީ މަޝްރޫޢުތަކަށް 2 ބިލިއަން ރުފިޔާ ހިމަނާފައިވެއެވެ. ދެވަނައަށް އެންމެ ބޮޑު އަދަދެއް ހިމަނާފައި ސަބްސިޑީއަށެވެ. ސަބްސިޑީތަކަށް 1 ބިލިއަން ރުފިޔާ ވަނީ ހިމަނާފައެވެ. މީގެ އިތުރުން ކޮންޓިންޖެންސީ ބަޖެޓަށް 600 މިލިއަން އަދި ސަރުކާރު ޙިއްޞާވާ ކުންފުނިތަކަށް 441 މިލިއަން ދިނުމަށް ވަނީ ހިމަނާފައެވެ. އަދި އާސަންދަ އާއި އެންސްޕާގެ ދަށުން، ބޭސްފަރުވާގެ އެހީ ދިނުމަށް 262.6 މިލިއަން ރުފިޔާ ހިމަނާފައިވެއެވެ. 

މީގެ އިތުރުން ސަރުކާރު މުވައްޒަފުންނަށް މުސާރަ ދިނުމަށްވެސް އިތުރު 24.4 މިލިޔަން ރުފިޔާ ވަނީ ހިމަނާފައެވެ.

ސަޕްލިމެންޓްރީ ބަޖެޓާއި އެކު މިއަހަރުގެ ބަޖެޓުގެ ޖުމުލަ އަދަދު 56 ބިލިއަން ރުފިޔާއަށް އަރާނެއެވެ.