2025 ވަނަ އަހަރަށް ދައުލަތުގެ ބަޖެޓު ހުށަހަޅާއިރު، އިޤްތިޞާދީ އިޞްލާޙީ އެޖެންޑާގެ ދަށުން މުސާރަ ތަކަށް ގެންނަވާ ބަދަލުތަކަށް އެއްބާރުލުން ދެއްވުމުގެ ގޮތުން މުސާރައިން ދެބައިކުޅަ އެއްބައި ނުނެންގެވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމަވައިފިއެވެ.

ރައީސުލްޖުމްހޫރިއްޔާ މިގޮތަށް ނިންމެވިކަން އެމަނިކުފާނު ހާަމަކުރެއްވީ، ސިޔާސީ މަޤާމުތަކާއި ދައުލަތުގެ ކުންފުނިތަކުގެ މުވައްޒަފުންގެ މުސާރަތައް ކުޑަކުރެއްވުމަށް ނިންމަވައި، އެކަން އިޢުލާނު ކުރައްވަމުންނެވެ.

ރައީސުލްޖުމްހޫރިއްޔާގެ މުސާރަފުޅަކީ، 100،000ރ އެވެ. އެހެން ކަމުން، އެމަނިކުފާނު މުސާރައިގެ ދެބައިކުޅަ އެއްބައި ދޫކޮށްލައްވާނަމަ، ދެން އެމަނިކުފާނަށް މުސާރަފުޅުގެ ގޮތުގައި ލިބިވަޑައިގަންނަވާނީ، 50،000ރ އެވެ.

ރައީސުލްޖުމްހޫރިއްޔާ އެމަނިކުފާނުގެ މުސާރަފުޅުން %50 އިންސައްތަ ދޫކޮށްލެއްވުމަށް ނިންމެވި އިރު، އެމަނިކުފާނަކީ، ވެރިކަމަށް ވަޑައިގެންނެވި އިރުވެސް މާލީ ގޮތުން ފުދުންތެރި ބޭފުޅެކެވެ. އެހެންކަމުން މުސާރަފުޅުން ބައެއް ދޫކޮށްލުމަކީ، އެމަނިކުފާނަށް ދަތިފުޅުވާނެ ކަމެއް ނޫނެވެ.

މީގެ ކުރިން ރައީސުލްޖުމްހޫރިއްޔާގެ މަޤާމު ފުރުއްވި، ރައީސް ޢަބުދުﷲ ޔާމީންވެސް އެމަނިކުފާނުގެ ދައުރުގެ ފުރަތަމަކޮޅުގައި، މުސާރަފުޅުން ދެބައިކުޅަ އެއްބައި ދޫކޮށްލެއްވިއެވެ. އެހެން ނަމަވެސް ފަހުން އެމަނިކުފާނު ހަމަ މުސާރަ ނަންގަވަން ފެއްޓެވީ، އެމަނިކުފާނުގެ އާއިލާގެ މާލީ ޙާލަތާއި ގުޅިގެން ކަމުގައި ވިދާޅުވެފައިވެއެވެ.