މިއަހަރުގެ މިހާތަނަށް ފުލުހުންނާއި ގުޅޭ 48 މައްސަލައެއް ބަލައި އޭގެ ތެރެއިން 17 ފުލުހަކު ވަޒީފާއިން ވަކިކޮށްފައިވާ ކަމުގައި ކޮމިޝަނަރ އޮފް ޕޮލިސް ޢަލީ ޝުޖާއު ވިދާޅުވެއްޖެއެވެ.

މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި، ސީޕީ ވިދާޅުވީ، ފުލުހުންގެ ތެރޭގައި ތަޙްޤީޤު ކުރެވޭ ފުލުހުންނާއި ގުޅޭ މައްސަލަތަކަކީވެސް މީގެ ކުރިން އެކަމާއި ގުޅޭ މައުލޫމާތު މީޑިއާއަށް ހާމަކުރެވޭ މައުލޫމާތު ނޫން ކަމަށެވެ. އެހެންނަަމަވެސް މިހާރުގެ ސިޔާސަތަކީ، ފުލުހުންނާއި ގުޅޭ ގޮތުން ހުށައެެޅޭ މައްސަލަތައް ބަލައި އެމައްސަލަކުގެ މައުލޫމާތުވެސް މީޑިއާއަށް އާއްމުކުރުން ކަމުގައި ސީޕީ ޝުޖާއު ވިދާޅުވިއެވެ.

މީގެ ކުރިން ފުލުހުންނާއި މެދު ހުށައެޅޭ މައްސަލަތަކުގައި ފުލުހުންގެ އެތެރޭގައި ހިންގާ ތަޙްޤީޤުތަކާއި ގުޅިގެން އަޅާ ފިޔަވަޅުތަކުގެ މައުލޫމާތު އޮންނަނީ ވަރަށް ބޮޑަށް ހިފަހައްޓާފައެވެ. 

ސީޕީ ވިދާޅުވީ، ފުލުހުންގެ ޕްރޮފެޝަނަލް ކޮމާންޑަޑް އާއި އެއްގޮތަށް މައްސަލަތައް ބަަލަމުންގެންދާ ކަމަށެވެ. މީގެ އިތުރުން ފުލުހުންގެ އިދާރާ ހަރުދަނާކޮށް، އަސާސީ ތަމްރީންތައް ހިންގުމުގެ މަސައްކަތް ކުރަމުންދާ ކަމަށާއި މިގޮތުން މިއަހަރުގެ މިހާތަނަށް، 360 ރެކްރޫޓުންނަށް ތަމްރީން ދެވިފައިވާ ކަމުގައި ސީޕީ ވިދާޅުވިއެވެ.