ރައްޔިތުން މަޖިލީހުގެ މީޑިއާ އެންޑް ކޮމިއުނިކޭޝަން ޑިރެކްޓަރުގެ މަޤާމުގައި ހުންނެވި ޙަސަން ޒިޔާޢު އެމަޤާމުން ވަކިކޮށްފިއެވެ.

ޙަސަން ޒިޔާޢު މަޤާމުން ވަކިކުރައްވާފައިވާކަން އޭނާ ވަނީ މީޑިއާތަކަށް ކަށަވަރުކޮށްދެއްވާފައެވެ.

ރައްޔިތުންގެ މަޖިލީހާއި ނޫސްވެރިންގެ މުޢާމަލާތު ކުރުމަށް އުފައްދާފައިވާ، ރައްޔިތުންގެ މަޖިލީހުގެ ވަޓްސްއެޕް ގުރޫޕްގައި އިއްޔެ ޒިޔާއު ލިޔުއްވި މެސެޖުގައި ވިދާޅުވީ، އޭނާ މަޤާމުން ވަކިކޮށްފައި ވަނީ، ޕާލިމަންޓަރީ ސާވިސްގެ ކޯޑް އޮފް ކޮންޑަކްޓާ ޚިލާފުވިކަމަށް ބުނެކަމަށެވެ.

ޒިޔާއު ލިޔުއްވި މެސެޖުގައި ވިދާޅުވީ، އޭނާ ހުންނެވި މަޤާމަކީ، ސިޔާސީ މަޤާމެއް ނޫންކަމަށާއި، އޭނާ މަޤާމުން ވަކިކޮށްފައި ވަނީވެސް، ޕާލަމެންޓަރީ ސާވިސްގެ ގަވާއިދާ ޚިލާފަށް ކަމަށެވެ. އަދި ޕާލަމެންޓަރީ ސާވިސް ގަވާއިދުގެ ކޯޑު އޮފް ކޮންޑަކްޓާ ހީލާފުވިކަމަށް ބުނެ ވަކިކޮށްފައި ވަނީ ރައްޔިތުންގެ މަޖިލީހުގެ އިދާރާގެ އިސްވެރިންގެ ބައެއް ނިންމުންތަކާ ދެކޮޅަށް އަޅުގަނޑު ވާހަކަ ދައްކާފައިވާތީ, ޒާތީ ހަސަދަވެރިކަން ފިލުވާލުމުގެ ގޮތުން ކަމުގައިވެސް ޒިޔާޢު ވަނީ ތުހުމަތު ކުރައްވާފައެވެ. އަދި ޒިޔާއު މަޤާމުން ވަކިކޮށްފައި ވަނީ،  ޕާލަމެންޓަރީ ސާވިސް ގަވާއިދާ ހިލާފަށް އެ ގާވާއިދުގައި ބަޔާންކުރާ އިޖުރާއަތްތަކާއިވެްސް ޚިލާފަށް އަދި ނޯޓިސްވެސް ނުދީކަން ޒިޔާއު ވަނީ ފާހަގަކުރައްވާފައެވެ.

އޭނާ ވަނީ، ޕާލަމެންޓަރީ ސާވިސް ޤަވާއިދާ ޚިލާފަށް ރާވައިގެން އޭނާ ވަޒީފާއިން ވަކިކުރި މައްސަލަ ވަޒީފާއާބެހޭ ޓްރައިބިއުނަލަށާއި ހިއުމަން ރައިޓްސް ކޮމިޝަން އަދި މަޖިލީހުގެ އާންމު ކޮމިޓީއަށް ހުށަހަޅުއްވާނެ ކަމުގައި ވިދާޅުވެފައެވެ.

ނޫސްވެރިކަމުގެ ދާއިރާއިންނާއި، މީޑިއާގެ ދާއިރާއިން މަތީ ތަޢުލީމު ޙާޞިލްކުރެއްވި ޙަސަން ޒިޔާއު، ދައުލަތުގެ މީޑިއާގައިވެސް ގިނަ ދުވަސްތަކެއް ވަންދެން ޚިދުމަތް ކުރައްވާފައިވެއެވެ.