މިސަރުކާރަށް އަހަރެއް ފުރިހަމަވާން ގާތްވިއިރު، އެއްވެސް ތަރައްޤީގެ މަޝްރޫއެއް ހިންގިފައި ނުވާކަމަށް ވިދާޅުވެ، ކުރީގެ ފިނޭންސް މިނިސްޓަރ އިބްރާހީމް އަމީރު މިސަރުކާރަށް ފާޑު ވިދާޅުވެއްޖެއެވެ.

ފިނޭންސް މިނިސްޓަރ އަމީރު މިހެން ވިދާޅުވީ، މިއަދު ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުމުގައި މިސަރުކާރުގެ ފޮރިން މިނިސްޓަރ މޫސާ ޒަމީރު ދެއްކެވި ވާހަކަފުޅަށް ރައްދު ދެއްވަމުންނެވެ.

މިއަދު ބޭއްވި ނޫސްވެރިންގެ ބައްދަލުވުމުގައި މިނިސްޓަރ ޒަމީރު ވަނީ، ދައުލަތުގެ މާލީ ހިސާބުތައް ބެލެހެއްޓުމުގައި ކުރީ ސަރުކާރުން އިހުމާލުވެފައިވާ ކަމަށް ވިދާޅުވެ އެކަން ބަލަމުންދާކަން ހާމަކުރައްވާފައެވެ. 

އެކަމަށް ރައްދުދެއްވައި، ކުރީގެ ފިނޭންސް މިނިސްޓަރ އަމީރު އެކްސްގައި ލިޔުއްވި ޕޯސްޓުގައި ވިދާޅުވީ، އެ އޮޅުވާލުން އޮޅުވާނުލާވެސް، ސަޕްލެމެންޓަރީ ބަޖެޓު ހުށަހެޅިދާނެކަމަށެވެ. އަދި މިސަރުކާރަށް އަހަރު ވެގެންދާއިރު ހިންގުނު އެއްވެސް ތަރައްޤީގެ މަޝްރޫއެއް ނެތް ކަމަށާއި، އިޤްތިޞާދީ ގިނަ ހަރަކާތްތައް ހުއްޓިއްޖެ ކަމުގައިވެސް ކުރީގެ ފިނޭންސް މިނިސްޓަރ އަމީރު ވިދާޅުވިއެވެ.

ކުރީގެ ފިނޭންސް މިނިސްޓަރ އަމީރު ވިދާޅުވީ، 49.9 ބިލިއަން ރުފިޔާގެ ބަޖެޓް ހުސްވިއިރު ހާލަތައް ހެޔޮ ބަދަލެއް އައީ ސަރުކާރުގެ ސިޔާސީ މަޤާމްތަކުގައި ހާހުން ތިބި މީހުންނާއި ކުންފުނި ތަކުގައި ތިބި އެކްޓިވިސްޓުންނަށް އެކަނިކަމަށެވެ. އަދި ބަލާ ކަމެއް ބަލާފަވެސް ތަފާސް ހިސާބުތައް ޝާއިއުކުރާހާ ދުވަސްވެއްޖެކަމުގައި އަމީރު ވިދާޅުވިއެވެ.

މިސަރުކާރު ވެރިކަމަށް އައުމަށް ފަހުގައި، މިއަހަރުގެ އޮގަސްޓްމަހުން ފެށިގެން ވަނީ، ދައުލަތުގެ މާލީ ހިސާބުތައް އާއްމުކުރުން ހުއްޓާލާފައެވެ. އެހެންވެ އެކަމުގެ ކަންބޮޑުވުންތައް އާއްމުން ގެންދަނީ ފާޅު ކުރަމުންނެވެ.