މިހިނގާ މަހާއި ކުރިޔަށް އޮތް މަހަކީ، ދައުލަތުގެ ކޭޝްފްލޯ އެންމެ ބޮޑަށް ދަތިވާނެ ދެމަސް ކަމުގައި، މިނިސްޓަރ އޮފް ފިނޭންސް މޫސާ ޒަމީރު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، ދައުލަތުގެ މާލީ ރިޕޯޓްތައް އާއްމު ކުރުމުގައި ކުރިމަތިވެފައިވާ ގޮންޖެހުންތަކާއި ގުޅޭ ގޮތުން މައުލޫމާތު ޙިއްޞާކުރެއްވުމަށް ބޭއްވި ނޫސްވެރިންގެ ބައްދަލުވުމުގައި ދެއްކެވި ވާހަކަފުޅުގައެވެ.

ނޫސްވެރިއަކު ކުރެއްވި ސުވާލަކަށް ޖަވާބު ދެއްވަމުން މިނިސްޓަރ މޫސާ ޒަމީރު ވިދާޅުވީ، ދައުލަތުގެ ކޭޝްފްލޯ ރަނގަޅުވާ ވަރަކުން، މިނިސްޓްރީ އޮފް ފިނޭންސުން ކުންފުނިތަކަށް ދޫކުރަންޖެހޭ ފައިސާ ދޫކުރަމުން ގެންދާ ކަމަށެވެ. އެހެން ނަމަވެސް މިހިނގާ މަހާއި އަދި ކުރިޔަށް މިއޮތް ނޮވެމްބަރު މަހަކީ، ދައުލަތުގެ ކޭޝްފްލޯ އެންމެބޮޑަށް ތާށިވާނެ ދެމަސްކަމުގައި މިނިސްޓަރ މޫސާ ޒަމީރު ވިދާޅުވިއެވެ.

މީގެ އިތުރުން މިނިސްޓަރ މޫސާ ޒަމީރު ވިދާޅުވީ، ދައުލަތުގެ ޚަރަދުތައް ކުޑަކުރެއްވުމަށް އަދިވެސް އިތުރު ފިޔަވަޅުތައް ސަރުކާރުން އަޅުއްވަމުން ގެންދަވާނެ ކަމަށެވެ. މިގޮތުން މިހާރު ސަރުކާރުގެ ކުންފުނިތަކަށް ގެންނަވާފައިވާ ބަދަލުތަކަކީވެސް އިޤުތިޞާދީ ރިފޯމްގެ މުހިއްމު ބައެއް ކަމުގައި އެމަނިކުފާނު ވިދާޅުވިއެވެ.

ފިނޭންސް މިނިސްޓަރ މޫސާ ޒަމީރު އިތުރަށް ވިދާޅުވީ، ސިޔާސީ މުވައްޒަފުން މަދުކުރުމުގެ ކަންތައްތަކަކީވެސް އޭގައި ރައްޔިތުންނާއި ގުޅުން ހުރި ، އަދި ޖަވާބުދާރީވުމަށްޓަކައި ކުރަންޖެހޭ އެއްކަންތައް ކަމަށެވެ.

ރައީސުލްޖުމްހޫރިއްޔާ މިހާރު ވަނީ ސިޔާސީ މަޤާމުތަކުން 228 މީހުން ވަކިކުރެއްވުމަށް ނިންމަވައި އެކަން އިއުލާނުކުރައްވާފައެވެ. އެހެން ނަމަވެސް ސިޔާސީ މަޤާމުތަކުން ވަކިކުރައްވާ ބޭފުޅުންނަކީ ކޮބައިކަމެއް އަދި ސަރުކާރުން ހާމައެއް ނުކުރައްވައެވެ.

މާލީ ދަތިތަކުގެ ތެރޭގައި ދައުލަތް އޮތް އިރު، ދައުލަތުން އަމިއްލަ ކުންފުނިތަކަށް ދޫކުރަންޖެހޭ ފައިސާ ނުލިބުމުގެ ސަބަބުން ކުންފުނިތައް ދަނީ ބަނގުރޫޓުވަމުންނެވެ. އަދި އިޤުތިޞާދީ ކާރިސާއެއްގެ ތެރެއަށް ދިވެހިރާއްޖެ ވެއްޓި، ދައުލަތް ބަނގުރޫޓު ވެދާނެ ކަމުގެ އިންޒާރުވެސް މާލީ އިދާރާތަކުން ގެންދަނީ ދެމުންނެވެ.