ފިނޭންސް މިނިސްޓަރ މޫސާ ޒަމީރު -- ފޮޓޯ: ރައީސް އޮފީސް
ދައުލަތުގެ މާލީ ހިސާބުތައް އާއްމު ކުރުން ހުއްޓާލީ ކުރީ ސަރުކާރުގެ ސަބަބުން ކަމުގައި ފިނޭންސް މިނިސްޓަރ ވިދާޅުވެއްޖެ
ދައުލަތުގެ މާލީ ހިސާބުތައް އާއްމުކުރުން ހުއްޓާލާފައި އޮތީ، ކުރީ ސަރުކާރުން ބަޖެޓު ހިސާބުތައް ހެދުމުގައި އަމަލުކޮށްފައިވާ ގޮތުގެ ސަބަބުން ކަމުގައި މިހާރުގެ ފިނޭންސް މިނިސްޓަރ މޫސާ ޒަމީރު ވިދާޅުވެއްޖެއެވެ.
މިނިސްޓަރ ޒަމީރު މިހެން ވިދާޅުވީ، މިއަދު ހަވީރު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަަަވަމުންނެވެ.
މިނިސްޓަރ މޫސާ ޒަމީރު ވިދާޅުވީ، ކުރީ ސަރުކާރުގައި ޚަރަދުކޮށްފައިވާ 2 ބިލިއަން ރުފިޔާއަށް ވީނުވީ ގޮތެއް ނޭނގޭ ކަމަށާއި، އެ މުއާމަލާތްތައް ދައުލަތުގެ މާލީ ހިސާބުތަކުގެ ތެރެއަށް ވައްދާފައި ނުވާކަމަށެވެ. އެހެންކަމުން ދައުލަތުގެ ހިސާބުތައް ހަމަޖެއްސޭނޭ ގޮތެއް ބެއްލެވުމަށްޓަކައި އޮޑިޓަރ ޖެނެރަލާއި އެކު މަޝްވަރާކުރައްވަމުން ގެންދަވާ ކަމަށާއި، އަދި ބަންޑާރަ ނައިބުގެ ލަފާ ހޯއްދަވާފައިވާ ކަމުގައި މިނިސްޓަރ މޫސާ ޒަމީރު ވިދާޅުވިއެވެ.
"ޙަޤީޤަތުގައި މިދިމާވާ މައްސަލައަކީ މިސާލަކަށް، ފޮރިންގ ފަންޑެޑް ޕްރޮޖެކްޓެއް އޭގެ ފައިސާ ދޫކުރާނީ ކޮންޓްރެކްޓަރަށް. ދޫކުރާއިރު، އެކަމަކު މިނިސްޓްރީ އޮފް ފިނޭންސްއިން، އެދުނީމާ މިދޫކުރަނީ. އެ ދޭއިރުގައި އަޅުގަނޑުމެން މި ރެކޯޑު ނުކޮށްފިކަމަށް ވެއްޖިއްޔާ، ދެން އެއް އަހަރު ފަހުން އަންނައިރުގައި އަޅުގަނޑުމެންނަށް މިދަންނަވާ ކަހަލަ، މައްސަލަ ދިމާވާނެ ދެއްތޯ؟"
ފިނޭންސް މިނިސްޓަރ މޫސާ ޒަމީރު ވިދާޅުވީ، މިދިޔައަހަރުގެ ބަޖެޓާއި ގުޅޭ މައްސަލަތައް ބަލައި އެކަންންކަން ހައްލުކުރުމަށް ޤާނޫނަށް އިސްލާޙެއް ގެންނަން ޖެހޭނަމަ އެކަންވެސް ކުރަންޖެހޭ ކަމަށެވެ. އަދި އެކަންކަމާއި ގުޅޭ ގޮތުން ބަންޑާރަ ނައިބާއިއެކު މަޝްވަރާކުރައްވަމުން ގެންދަވާކަމުގައިވެސް މިނިސްޓަރ ޒަމީރު ވިދާޅުވިއެވެ.
ދައުލަތުގެ ބަޖެޓާއި ޚަރަދުތަކާއި ގުޅޭ ރިޕޯޓްތައް ޤާނޫނުގައި ބަޔާންކޮށްފައިވާ ގޮތަށް އަލުން އާއްމުކުރަންފެށޭނެ ދުވަހެއް މިނިސްޓަރު ވިދާޅެއް ނުވެއެވެ.