ސްޓެލްކޯގެ މުވައްޒަފުން އިމާރާތް ކުރަމުން ގެންދާ އެކުންފުނީ ބިޒްނަސް ސެންޓަރުގެ މަސައްކަތް ނިމުމަކާއި ގާތްވެފައިވާކަމުގައި އެކުންފުނީގެ މެނޭޖިންގ ޑައިރެކްޓަރ ޙުސައިން ފަޙްމީ ވިދާޅުވެއްޖެއެވެ.

އެމަޝްރޫޢާއި ގުޅޭ މައުލޫމާތު ޙިއްޞާކުރައްވައި، ފަޙްމީ އެކްސްގައި ކުރެއްވި ޕޯސްޓްގައި ވިދާޅުވީ، ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒުގެ ލީޑަރޝިޕާއި ތަޞައްވަރުގެ ދަށުން ސްޓެލްކޯއިން ތަރައްޤީކުރަމުން އަންނަ އެކުންފުނީގެ ބިޒްނަސް ސެންޓަރުގެ މަސައްކަތް މިހާރު ވަނީ ނިމުމަކާއި ހަމައަށް ގޮސްފައި ކަމަށެވެ. ފަހުމީ ދިދާޅުވީ، 7500 އަކަފޫޓުގެ އެއިމާރާތަކީ، ދެބުރިއަށް އަޅާ އިމާރާތެއް ކަމަށާއި އެ އިމާރާތުގެ މަސައްކަތް ކުރަމުން އަންނަނީ އެކުންފުނީގެ ހީވާގި މުވައްޒަފުންކަމަށެވެ.

ފަހުމީ ވިދާޅުވީ، އެއިމާރާތް އެޅުމުގެ މަސައްކަތް އެކުންފުނީގެ މުވައްޒަފުން ކުރުމުން ގާތްގަނޑަކަށް 13 މިލިއަނެއްހާ ރުފިޔާ ސަލާމަތް ކުރެވޭނެ ކަމަށެވެ. 

ސްޓެލްކޯގެ ބިޒްނަސް ސެންޓަރުން، އިންޖީނު، ޓްރާންސްފޯމަރު، ކޭބަލް، އަދި ސްޓޯރޭޖް ސިސްޓަމްތައް ހިމެނޭ ގޮތަށް އަދި އިއާދަކުރަނިވި ހަކަތައަށް ބޭނުންވާ އައު ކޮމްޕްރެހެންސިވް ސޮލިއުޝަންތައް ފޯރުކޮށްދޭނެ ކަމަށެވެ. އަދި ދިމާވެދާނެ ކުއްލި ހާލަތަކަށް ރާއްޖެ ފުރިހަމައަށް ތައްޔާރުވެފައި އޮތުންވެސް ކަށަވަރު ކުރެވިގެންދާނެކަން ފަޙްމީ ފާހަގަކުރެއްވިއެވެ.

ފަޙްމީ ވިދާޅުވީ، އެމަޝްރޫޢުގެ ކާމިޔާބީ ގުޅިފައި ވަނީ، ހަކަތައިގެ ދާއިރާއިން ދިވެހިރާއްޖެއަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ގެނައުމަށް މަސައްކަތްކުރައްވަމުންގެންދަވާ ކުރިއެރުންތަކާއި ކަމަށެވެ.