ދުުންފަތުގެ އިސްތިއުމާލުކުރުން ހުއްޓާލުމަށް ބާރު އެޅުމުގެ ގޮތުން އަނެއްކާވެސް އަލުން އިނާމް ދެއްވަން ފެއްޓެވުމަށް ސަރުކާރުން ނިންމަވައި އެކަން އިޢުލާނު ކުރައްވައިފިއެވެ.

ރައީސުލްޖުމްހޫރިއްޔާގެ އޮފީހުން ހާމަކުރައްވާފައިވާ ގޮތުގައި، ބުދަ ދުވަހު ބޭއްވި ވަޒީރުންގެ މަޖިލީހުގެ ޖަލްސާގައި، ދުންފަތުގެ އިސްތިޢުމާލު ނުކުރާ ރަށްރަށް ފާހަގަކޮށް އެރަށްރަށަށް އިނާމް ދިނުމަށް ވަނީ ހުށައަޅުއްވާފައެވެ. 

ރައީސުލްޖުމްހޫރިއްޔާގެ އޮފީހުން ވިދާޅުވީ، މީހުން ދުންފަތާއި ދުރު ކުރުމަށް، އެކަށައަޅާ މާސްޓަރ ޕްލޭންގައި، ދުންފަތާ ދުރު މުޖުތަމަޢުއެއް ބިނާކުރުމަށް އިޖުތިމާޢީ ގޮތުން ހަރަކާތްތެރިވާ ފަރާތްތަކާއި، ދުންފަތުގެ އިސްތިޢުމާލުނުކުރާ ރަށްރަށް ފާހަގަކުރުމަށް އިނާމެއް ތަޢާރުފުކުރުމާއެކު، އެ އިނާމު ލިބޭ ރަށެއްގެ އިޖްތިމާޢީ ކަމަކަށް މާލީ އެހީތެރިކަން ދިނުން ފަދަ ކަންކަން މާސްޓަރ ޕްލޭންގައި ހިމެނުމަށް ވަނީ ނިންމާފައެވެ.

މީގެ އިތުރުން އެ މާސްޓަރ ޕްލޭންގައި، ދުންފަތާ ދުރުހެލިވާން ބޭނުންވާ ފަރާތްތަކަށް ޚާއްޞަ ފަރުވާ، ކޮންމެ ރަށެއްގެ ޞިއްޙީ ޚިދުމަތްދޭ މަރުކަޒަކުން ހިލޭ ފޯރުކޮށްދޭ ގޮތަށް ހިމެނުއްވުމަށްވެސް ރައީސުލްޖުމްހޫރިއްޔާ ވަނީ ނިންމަވާފައެވެ.

ރާއްޖޭގައި ދުންފަތުގެ އިސްތިއުމާލުކުރުމަކީ، ވަރަށް ބޮޑަށް އާއްމުވެފައިވާ ކަމެކެވެ. ސަރުކާރުން މިހާރު ވަނީ، ރާއްޖޭގައި ވޭޕް ބޭނުންކުރުން މަނާކުރުމަށް ނިންމަވައި، އަދި ސިނގިރެޓާއި ބިޑިފަދަ ތަކެތިން ނަގާ ޑިއުޓީ އިތުރަށް ބޮޑު ކުރުމަށް ނިންމާފައެވެ.

ދުުންފަތުގެ އިސްތިއުމާލުކުރުން ހުއްޓާލުމަށް ބާރު އެޅުމުގެ ގޮތުން މީގެ ކުރިންވެސް ސަރުކާރުން އިނާމް ވަނީ ދެއްވާފައެވެ. 1990ގެ އަހަރުތަކުގެ ތެރޭގައި ދުންފަތުގެ އިސްތިއުމާލުކުރާ މީހުން ނޫޅޭ ރަށްރަށް ފާހަގަކޮށް އެވޯޑުވެސް ދެއްވާފައިވެއެވެ.