ހއ. ހޯރަފުށި އެއާޕޯޓަށް ރޭގަނޑުގެ ދަތުރުތައް ފަށައިފި އެވެ. ހޯރަފުށި އެއާޕޯޓުގެ މި ދަތުރުތައް ރަސްމީކޮށް އިފްތިތާހުކޮށްދެއްވީ ރީޖަނަލް އެއާޕޯޓްސްގެ މެނޭޖިން ޑިރެކްޓަރު މުހައްމަދު ރިޒްވީ އެވެ. މިއީ ރީޖަނަލް އެއާޕޯޓްސް ކޮމްޕެނީ ލިމިޓެޑް (އާރްއޭސީއެލް) އިން ހިންގާ އެއަރޕޯޓެކެވެ އަދި ފުރަތަމަ ދަތުރު ކޮށްފައިވަނީ ރޭގައެވެ.

ރޭގަނޑުގެ ދަތުރުތައް ފެށުމަށް އެ ރަށުގައި ބޭއްވި ހާއްސަ ރަސްމިއްޔާތުގައި އެ ރަށުގެ ކައުންސިލްގެ ރައީސް މުހައްމަދު ވަހީދު ވިދާޅުވީ ރޭގަނޑުގެ ދަތުރުތައް ފެށުމަކީ ރައްޔިތުންނަށް އިތުރަށް ފަސޭހަވެގެން ދާނެ ކަމެއް ކަމަށެވެ. އެގޮތުން، ބޭސްފަރުވާއަށް ކުއްލި ހާލަތުގައި ކުރަންޖެހޭ ދަތުރުތައް ހެނދުނަށް ފަސްކުރަން ޖެހުން ފަދަ އުނދަގޫތަކަށް ހައްލު ލިބޭނެ ކަމަށް ވިދާޅުވި އެވެ.

މި ރަސްމިއްޔާތުގައި ރީޖަނަލް އެއާޕޯޓްސްގެ މެނޭޖިން ޑިރެކްޓަރު ރިޒްވީ ވިދާޅުވީ، ރޭގަނޑު ދަތުރުތައް ފެށުމުގެ ސަބަބުން ރަށުގެ އިޤްތިސާދަށް ފައިދާތަކެއް ލިބޭނެކަމަށެވެ.

ރޭގަނޑުގެ ދަތުރުތައް ފެށުމާ ގުޅިގެން އެ އެއާޕޯޓުގެ އޮޕަރޭޝަންތައް 24 ގަޑިއިރަށް ވަނީ ބަދަލުކޮށްފަ އެވެ.

އާރްއޭސީއެލްއިން އަންނަނީ މާވަރުލު އެއާޕޯޓުގައި ވެސް ރޭގަނޑުގެ ދަތުރުތައް ފެށުމަށް މަސައްކަތްކުރަމުންނެވެ.

ހޯރަފުށި އެއާޕޯޓުގެ އިތުރުން ހަނިމާދޫ އިންޓަނޭޝަނަލް އެއާޕޯޓާއި ކުޅުދުއްފުށި އެއާޕޯޓާއި ފަރެސްމާތޮޑާ އެއާޕޯޓާއި ފުވައްމުލަކު އެއާޕޯޓުގައި ވެސް އެ ކުންފުނިން ދަނީ ރޭގަނޑު ދަތުރުތައް ކުރުމުގެ ހިދުމަތް ދެމުންނެވެ.