މިއަދު ކުއްލި ގޮތަކަށް ހުރަވީ ސްކޫލުގެ ދަރިވަރަކު ސްކޫލުގައި އިންދައި ނިޔާވި ހާދިސާ ހިނގިގޮތް ހާމަކުރުމަށް މިނިސްޓްރީ އޮފް އެޑިޔުކޭޝަނުން ދެކޮޅު ހަދައިފިއެެވެ.

ނިޔާވި ކުއްޖާއަކީ ކުރިން އެއްވެސް ޞިއްޙީމައްސަލައެއް ހުރި ކުއްޖެއްތޯ ނުވަތަ ނޫންތޯ ސުވާލު ކުރުމުން އެމިނިސްޓްރީން ވިދާޅުވީ އެސުވާލަށް ޖަވާބުދޭން ބޭނުން ނުވާކަމަށެވެ. ނިޔާވި ދަރިވަރަކީ، ހުރަވީ ސްކޫލުގެ ގްރޭޑް 7 ގައި ކިޔަވަމުން އައި ދަރިވަރެއްކަން އެނގިފައިވެއެވެ. ނިޔާވި ދަރިވަރަކީ، އުމުރުން 13 އަހަރުގެ  ފާޠިމަތު ޝިމާ މުޙައްމަދެވެ.

ސަރުކާރާއި ގުޅުން އޮތް ބައެއް އޮންލައިންތަކުން ރިޕޯޓްކޮށްފައިވާ ގޮތުގައި ކުއްޖާ ނިޔާވީ އިންޓަރވަލްގަޑީގައި ކާން އިންދައެވެ. އަދި އެކުއްޖާއަކީ ފިޓްޖެހޭ ކުއްޖެއްކަމަށް ވެސް ބައެއް ނޫސްތަކުގައި ރިޕޯޓްކޮށްފައި ވެއެވެ. އެހެންކަމުން ކުއްޖާ ނިޔާވީ، ކާން އިންދައި ކޮށިއަރައިގެން، ކާތަކެތި ނޭވާހޮޅީގައި ތާށިވެގެން ކަމަށް ބެލެވުނު ނަމަވެސް، ހާދިސާ ހިނގިގޮތާއި ގުޅޭ ގޮތުން މިހާތަނަށް ފުލުހުންގެ އިދާރާއިން އެއްޗެއް ވިދާޅެއް ނުވެއެވެ. ފުލުހުންގެ އިދާރާއިން ވިދާޅުވީ މަރުގެ އެމައްސަލަ ބަލަމުންދާ ކަމަށެވެ.

ހުރަވީ ސްކޫލުގެ ދަރިވަރަކު ކުއްލި ގޮތަކަށް ނިޔާވުމާއި ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ، އެކުއްޖާގެ އާއިލާއަށާއި ރައްޓެހިންނަށް ތަޢުޒިޔާ ފޮނުއްވާފައެވެ.