ރައީސް ޑރ. މުހައްމަދު މުއިއްޒު ގެ ނިންމެވުމާއި އެއްގޮތަށް އިޒްރޭލު ޕާސްޕޯޓު މަނާކުރުން އަވަސް ކުރުމަށް، ސަރުކާރު ހިންގާ ޕާޓީ ޕީއެންސީން ސަރުކާރަށް ގޮވާލައިފިއެވެ.

ޕީއެންސީން ވަނީ، އިޒްރޭލް ޕާސްޕޯޓު މަނާކުރުން އަވަސް ކުރުމަށް ގޮވާލައި ނޫސްބަޔާނެއް ނެރެފައެވެ. އެނޫސް ބަޔާނުގައި ޕީއެންސީން ބުނެފައި ވަނީ، ރައީސް ޑރ. މުހައްމަދު މުއިއްޒު ނިންމަވާފައިވާ ގޮތަށް އިމިގްރޭޝަން ގާނޫނަށް ގެންނަން ޖެހޭ ބަދަލުތައް ވީހާވެސް އަވަހަށް ގެނައުމަކީ އެޕާޓީން ތާއީދު ކުރާ ކަމެއް ކަމަށެވެ.

އަދި މިހާރު ރައްޔިތުންގެ މަޖިލީހުގައި އޮތް އިމިގްރޭޝަންގެ ގާނޫނު އިސްލާހު ކުރުމުގެ ބިލު ދިރާސާ ކުރުމުގެ މަސައްކަތް އަވަހަށް ނިންމައި، ރައްޔިތުންގެ ރޫހާއި ވިންދާ އެއްގޮތަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ނިންމަވާފައިވާ ނިންމެވުން ހަގީގަތަކަށް ހެދުމުގެ މަސައްކަތް މަޖިލީހުން ހަލުވިކަމާއެކު ކުރުމަށްވެސް އެ ޕާޓީން އިލްތިމާސްކުރާ ކަމުގައި ޕީއެންސީން ނެރުނު ބަޔާނުގައި ބުނެފައިވެއެވެ.

އިޒްރޭލް ޕާސްޕޯޓު މަނާކުރުމާއި ގުޅޭ ބިލް މަޖިލީހުގައި ޕާކުކޮށްފައި އޮތީވެސް، ޕީއެންސީގެ ނުފޫޒުންނެވެ. ރައްޔިތުންގެ މަޖިލީހުގައި އެޕާޓީގެ ސުޕަރ މެޖޯރިޓީ އޮތް އިރު، އެޕާޓީން ބޭނުންވާނަމަ އިޒްރޭލް ޕާސްޕޯޓު މަނާކުރުމާއި ގުޅޭ ބިލް މަޖިލީހުން 24 ގަޑިއިރުގެ ތެރޭގައިވެސް ފާސްކުރެވިދާނެއެވެ. އެހެން ނަމަވެސް އިޒްރޭލް ޕާސްޕޯޓު މަނާކުރުމަށް ގޮވާލައި، ގަލޮޅު ދެކުނު ދާއިރާގެ މެންބަރު މީކާއީލް އަޙްމަދު ނަސީމް ހުށައެޅުއްވި އިމިގްރޭޝަންގެ ޤާނޫނަށް އިސްލާޙް ގެނައުމުގެ ބިލް މަޖިލީހުގެ ޤައުމީ ސަލާމަތާއި ބެހޭ 241 ކޮމިޓީގައި އޮންނަތާ 4 މަސްދުވަސް ވަނީ ވެފައެވެ.