ސަރުކާރުގެ ސިޔާސީ މަޤާމުތަކުގެ ތިއްބެވި 228 މީހަކު ވަޒީފާއިން ވަކިކުރެއްވުމަށް ނިންމަވައިފިކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހާމަކުރައްވައިފިއެވެ.

އެކްސްގައި އެމަނިކުފާނު ކުރެއްވި ޕޯސްޓެއްގައި ވިދާޅުވީ، ސިޔާސީ މަޤާމުތައް މަދު ކުރެއްވުމަށް ނިންމަވާފައި ވަނީ، އިޤުތިޞާދީ ރިފޯމް އެޖެންޑާގެ ދަށުން ކަމަށެވެ. މިގޮތުން ކުރިޔަށް އޮތް 15 ދުވަހުގެ ތެރޭގައި އެމުވައްޒަފުން ވަކިކުރައްވާނެ ކަމުގައި ރައީސުލްޖުމްހޫރިއްޔާ ވަނީ ވިދާޅުވެފައެވެ.

އެކި މިނިސްޓްރީ ތަކުން މަޤާމުން ވަކިކުރެއްވުމަށް ނިންމަވާފައިވާ، 228 ސިޔާސީ މުވައްޒަފުންގެ ތެރޭގައި ހިމެނެނީ، 7 ސްޓޭޓް މިނިސްޓަރުންނާއި، 43 ޑެޕިއުޓީ މިނިސްޓަރުންނާއި، 109 ސީނިއަރ ޕޮލިޓިކަލް ޑައިރެކްޓަރުންނާއި، 69 ޕޮލިޓިކަލް ޑައިރެކްޓަރުންނެވެ. މިމަޤާމުތަކުގައި ތިއްބެވި ފަރާތްތައް މަޤާމުން ވަކު ކުރުމުން ސަރުކާރުގެ ބަޖެޓުން މުސާރައަށް ކުރާ ހޭދައިން، މަހަކު 5.714 މިލިއަން ރުފިޔާ ސަލާމަތް ކުރެވޭނެ ކަމުގައި ރައީސުލްޖުމްހޫރިއްޔާ ވަނީ ފާހަގަކުރައްވާފައެވެ.