ވެލާނާ އިންޓަރނޭޝަނަލް އެއާޕޯޓުގައި މަތިންދާ ބޯޓުތަކުގެ ލަގެޖު އުފުލާ ވެހިކަލެއް ދުއްވަމުންދަނިކޮށް ޑްރައިވަރު މަރުވެއްޖެއެވެ.

ފުލުހުންގެ އިދާރާއިން ވިދާޅުވީ، މިހާދިސާ ހިނގާފައި ވަނީ މިއަދު ހެނދުނު، 9:28 ހާއިރުގައި ކަމަށެވެ. އެމީހާއަށް ޞިއްޙީމައްސަލައެއް ދިމާވިކަން އެނގުނީވެސް، އޭނާ އޭޕްރަންގައި ދުއްވަމުން ދިޔަ ވެހިކަލް ކޮންޓްރޯލް ގެއްލި، އެއާޕޯޓުގައި މަތިންދާ ބޯޓުތައް ޕާކުކޮށްފައިި އޮންނަ ސަރަހައްދުގައި ކެމެރާ އާއި ލައިޓް ހަރުކުރުމަށް ޖަހާފައި ހުރި ތަނބެއްގައި ބުޑުގައިޖެހި އެކްސިޑެންޓް ވުމުންނެވެ.

ފުލުހުންގެ އިދާރާއިން ވިދާޅުވީ، ހާދިސާ ހިނގުމާއި އެކު އެއާޕޯޓުގައި ހުންނަ މެޑިކަލް ކްލިނިކަށް އެމީހާ ވަގުތުން ގެންދެވުނު ކަމަށާއި، އަދު ފަހުން އިންދިރާ ގާނދީ މެމޯރިއަލް ހޮސްްޕިޓަލަށްވެސް ގެންދެވުނު ކަމަށެވެ. އެހެން ނަމަވެސް އެއާޕޯޓުގެ ކްލިނިކަށް ގެންދެވުނު އިރުވެސް އެމީހާ އޮތީ މަރުވެފައި ކަމަށާއި، އޭނާގެ ހަށިގަނޑުގެ ބޭރުފުށުން އެއްވެސް އަނިޔާއެއް ލިބިފައި ނެތް ކަމުގެ ފުލުހުންގެ އިދާރާއިން ވިދާޅުވިއެވެ.

ފުލުހުންގެ އިދާރާއިން ވިދާޅުވީ، މިހާތަނަށް ބެލި ބެލުމުން އެ އެކްސިޑެންޓް ހިނގަން މެދުވެރިވީ، އެ ވެހިކަލް ދުއްވަން އިން މީހާއަށް ޞިއްޙީ މައްސަލައެއް ދިމާވެގެން ކަމަށް ވަނީ ބެލެވިފައެވެ. މިހާދިސާގައި ނިޔާވެފައި ވަނީ އުމުރުން 45 އަހަރުގެ ދިވެހި ފިރިހެނެއް ކަމުގައި ފުލުހުންގެ އިދާރާއިން ވިދާޅުވިއެވެ.

ނިޔާވި އެމްއޭސީއެލްގެ މުވައްޒަފު، އަސްލަމް އާދަމް --

އެމްއޭސީއެލްއިން ހާމަކުރައްވާފައިވާ ގޮތުގައި މިއަދު ހިނގި މިހާދިސާގައި ނިޔާވެފައި ވަނީ، އެކުންފުނީގެ މުވައްޒަފެއްކަމުގައިވާ އަސްލަމް އާދަމްއެވެ. އޭނާ ނިޔާވުމާއި ގުޅިގެން ކުންފުނިން ވަނީ އޭނާގެ އާއިލާއަށް ތަޢުޒިޔާ ކިޔާފައެވެ.