ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުﷲ ދިރިއުޅުއްވާ، ރަސްމީ ގެކޮޅުގެ މުވައްޒަފުންނާއި ގުޅޭ މައުލޫމާތު ސިއްރު ކުރުމަށް، އިއްޔެ ރައްޔިތުންގެ މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީން ނިންމި ނިންމުން ރައީސުލްޖުމްހޫރިއްޔާ އަންގަވައިގެން ބަދަލުކޮށްފިއެވެ.

އިއްޔެ ހެނދު ބޭއްވި މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީގެ ބައްދަލުވުމުގައި ނިންމީ، މަޖިލީހުގެ ރައީސްގެ ގެކޮޅުގެ މުވައްޒަފުންނާއި އެމުވައްޒަފުންގެ މުސާރަތައް ހާމަކުރުމަަކީ، މަޖިލީހުގެ ރައީސްގެ ސަލާމަތަށް ނުރައްކާ ވެދާނޭ ކަމަކަށް ވާތީ، އެމައުލޫމާތު ސިއްރު ކުރުމަށެވެ. އަދި އެގޮތަށް ނިންމި ބައްދަލުވުން ކުރިޔަށް ގެންދިޔައީ ސިއްރުކޮށްގެންނެވެ. އަދި ފަހުން އެނިންމުން ބަދަލުކުރި ބައްދަލުވުން ކުރިޔަށް ގެންދިޔައީ ހުޅުވާލައިގެންނެވެ.

ރައްޔިތުންގެ މަޖިލީހުގެ ރައީސް ޢަބްދުއްރަހީމް ޢަބްދުﷲ ދިރިއުޅުއްވާ ގެކޮޅުގެ މުވައްޒަފުންނާއި މުސާރަ އާއި ގުޅޭ މަޢުލޫމާތު ސިއްރު ކުރުމަށް ފުރަތަަމަ ހުށައެޅުއްވީވެސް ޕީއެންސީގެ ޕާލަމެންޓްރީ ގުރޫޕްގެ ލީޑަރު އިބްރާާހިމް ފަލާޙް ނަމަވެސް ފަހުން އެނިންމުން ބަދަލުުކުރި ކޮމިޓީ ބައްދަލުވުމުގައިވެސް، އެކަން ބަދަލުކުރެއްވުމަށްވެސް ހުށައެޅުއްވީ ފަލާޙްއެވެ. އެގޮތުން ހޯދަން އެދިފައިވާ ހުރިހާ މައުލޫމާތެއް ފޯރުކޮށްދިނުމަށް ފެންނަ ކަމަށްވެސް ފަލާޙް ވަނީ ފަހުން ބޭއްވި ކޮމިޓީ ބައްދަލުވުމުގައި ވިދާޅުވެފައެވެ. 

މިބައްދަލުވުމުގައި ރައްޔިތުންގެ މަޖިލީގުގެ ދަނގެތީ ދާއިރާގެ މެމްބަރު މުޙައްމަދު ނާޒިމް ވަނީ، ޤައުމީ ސަލާމަތަށް ނުރައްކަލެއް އޮތް މައުލޫމާތު ފިޔަވައި އެހެން ހުރިހާ މައުލޫމާތެއް ހާމަކުރައްވާނެ ކަމުގައި ރައީސުލްޖުމްހޫރިއްޔާ ވިދާޅުވެފައިވާތީ، އެވަޢުދުފުޅު ދެމެހެއްޓުމުގެ ގޮތުންވެސް މައުލޫމާތު ހާމަކުރަންޖެހޭކަން ފާހަގަކުރައްވާފައެވެ.

ރައްޔިތުންގެ މަޖިލީހުގެ ރައީސްގެ ރަސްމީ ގެކޮޅުކަމުގައި މުރައިދޫގެ ހަމަޖެއްސެވީ، މެއި 6، 2022 ގައި ރައީސް ނަޝީދަށް އަމާޒުކޮށް ދިން ހަމަލާއަށް ފަހުގައެވެ. އަދި މަޖިލީހުގެ ރައީސްގެ ގެކޮޅު ކަމުގައި އެގެކޮޅު ހަމަޖެއްސެވީ، ރައީސް ނަޝީދަށް އޮތް ނުރައްކާތަކުގެ ސަބަބުން، ސަލާމަތީ ސަބަބުތަކަށްޓަކައެވެ.

ރައީސް ނަޝީދަށްފަހު މަޖިލީހުގެ ރައީސް ކަމުގެ މަޤާމް ފުރުއްވި، މުޙައްމަދު އަސްލަމް އެ ގެކޮޅުގައި ދިރިނޫޅުއްވައެވެ.