ރާއްޖެއަށް ވޭޕް އެތެރެކުރުމާއި އޭގެ ވިޔަފާރި ކުރުމާއި ބޭނުންކުރުން މަނާކުރުމަށް އިއްޔެ ރައީސުލްޖުމްހޫރިއްޔާ ނިންމެވި ނިންމެވުން ތަންފީޒްކުރެއްވުމަށްޓަކައި، ޤާނޫނަށް ގެންނަން ޖެހޭ ބަދަލުތައް ގެނައުމަށް މިހަފްތާގައި ރައްޔިތުންގެ މަޖިލީހަށް ހުށައަޅުއްވާނެ ކަމުގައި، ބަންޑާރަނައިބު، އަހުމަދު އުޝާމް ވިދާޅުވެއްޖެ އެވެ.

ބަންޑާރަނަ ނައިބު އުޝާމް މިހެން ވިދާޅުވީ، އެކްސްގައި ލިޔުއްވި ޕޯސްޓެއްގައެވެ. ވޭޕް މަނާކުރުމަށް ދުންފަތް ކޮންޓްރޯލް ކުރުމާބެހޭ ގާނޫނަށާއި ދިވެހިރާއްޖޭގެ އެކްސްޕޯޓް އިމްޕޯޓް ގާނޫނަށް ބަދަލުގެންނަން ޖެހޭނެއެވެ. 

އެކްސްގައި ލިޔުއްވި ޕޯސްޓްގައި އުޝާމް ވިދާޅުވީ، ރައީސްގެ ނިންމެވުން ތަންފީޒުކުރުމަށްޓަކާ ގާނޫނުތަކަށް ގެންނަންޖެހޭ އިސްލާހުތައް މިހަފްތާގެ ތެރޭގައި މަޖިލީހަށް ފޮނުވުމަށް ކުރަންޖެހޭ މަސައްކަތް ކުރައްވަމުން ގެންދަވާ ކަމަށާއި، އެގޮތުން ދުންފަތް ކޮންޓްރޯލްކުރުމާބެހޭ ގާނޫނާއި ދިވެހިރާއްޖޭގެ އެކްސްޕޯޓް އިމްޕޯޓް ގާނޫނަށް އިސްލާހު ގެނައުމަށް މަޖިލީހަށް ހުށަހެޅުމަށް ވާނީ ނިންމާފައި ކަމަށެވެ. 

ވޭޕް މަނާކުރުމަށް ރައީސުލްޖުމްހޫރިއްޔާ އިއްޔެ ނިންމެވި ނިންމެވުމާއި އެކު ސަރުކާރާއި އިދިކޮޅު ބައެއް ފަރާތްތަކުން ވަނީ އެނިންމުމަށް ތަޢޫރީފުކޮށްފައެވެ. އެހެން ނަމަވެސް ބައެއް އެހެން ފަރާތްތަކުން ވަނީ ރައީސްގެ އެނިންމެވުމަށް ފާޑުވެސް ކިޔާފައެވެ.

ދުނިޔޭގެ 35 ޤައުމެއްގައި މިހާރުވެސް ވޭޕް އެތެރެކުރުން މަނާކޮށްފައިވެއެވެ. އެހެން ނަމަވެސް އޭގެތެރެއިން ބައެއް ޤައުމުތަކަކީ، އެޤައުމުތަކުގައި ފުޅާ ދާއިރާއެއްގައި ވޭޕް އުފައްދައި އޭގެ ވިޔަފާރި ކުރަމުން އަންނަ ޤައުމުތަކެވެ.

ވޭޕަކީ އޭގެ ދުމުގެ ސަބަބުން އިންސާނާގެ ފުއްޕާމެއަށް ވަރަށް ބޮޑަށް ގެއްލުންދޭ އެއްޗަކަށް ވާތީ، ވޭޕް މަނާކުރުމަށް ޑޮކްޓަރުންނާއި، ޞިއްޙީދާއިރާގެ ތަޖުރިބާކާރުންނާއި، ބެލެނިވެރިން އައީ ސަރުކާރަށް ގޮވާލަމުންނެވެ.