ގއ. މާމެންދޫ، ބީޗްވިލާ، ވިފާގް އިބްރާހިމް އަދުނާނުގެ މަރާއިގުޅިގެން، ޗެނަލް 13 އިން ގެނެސްދިން ޑޮކިއުމެންޓްރީގައި، ފުލުހުންނަށާއި، ރައްޔިތުންގެ މަޖިލީހުގެ ނައިބު ރައީސް އަޙްމަދު ނާޒިމަށްކޮށްފައިވާ ތުހުމަތުތައް ދޮގުކޮށް، ފުލުހުން ބޭއްވި ނޫސްވެރިންގެ ބައްދަލުވުމުގައި، ވިފާޤުގެ ވަރަށް ޒާތީ، މައުލޫމާތު ހާމަކުރުމުން އެކަމަށް އާއްމުންގެ ފާޑިކިޔުންތައް އަމާޒުވުމުން ފުލުހުން މަޢާފަށް އެދިއްޖެއެވެ.

ފުލުހުންގެ އިދާރާއިން އާދީއްތަ ދުވަހު ބޭއްވި ނޫސްވެރިންގެ ބައްދަލުވުމުގައި ވަނީ، އަލްމަރްޙޫމާ ވިފާގް އިބްރާހިމް އަދުނާނުގެ ވަރަށް ޒާތީ މަޢުލޫމާތު، އޭނާގެ އަބުރާއި ޤަދަރާއި ކަރާމާތަށް އުނިކަން ލިބޭ ގޮތަށް ހާމަކޮށްފައެވެ. އަދި މުޅި ނޫސްކޮންފަރެންސްގައިވެސް ފުލުހުން ވާހަކަ ދައްކާފައި ވަނީ، މަޖިލީހުގެ ނައިބު ރައީސް އަޙްމަދު ނާޒިމާއި، ފުލުހުންގެ މައްޗަށް ޗެނަލް 13 ކޮށްފައިވާ ތުހުމަތުތައް ދޮގުކުރުމަށެވެ. މިގޮތުން އެކަމަކީ، ދޮގެއްކަން ބަޔާންކޮށްދިނުމަށް ކޮންމެހެން ހާމަކުރަން ނުޖެހޭ، ވިފާޤުގެ ޒާތީ މައުލޫމާތު ފުލުހުން ވަނީ ހާމަކޮށްފައެވެ.

ފުލުހުންގެ އިދާރާއިން ރޭ ނެރުނު ނޫސްބަޔާނުގައި ވިދާޅުވީ، ވިފަޤާއި ގުޅޭ ގޮތުން ފުލުހުން އާއްމުކުރި މައުލޫމާތަކީ، އާއިލާއަށް އެކަން އެނގިގެން އާއްމުކޮށްފައިވާ މައުލޫމާތު ކަމަށެވެ. އަދި އެހާ ތަފްސީލްކޮށް އެމައުލޫމާތު ހިއްސާކުރަން ޖެހުނީ، ވިފާޤުގެ މަރާއިގުޅޭ ގޮތުން ފަތުރާ ވާހަކަތަކާއި ގުޅިގެން ކަމުގައިވެސް ފުލުހުންގެ އިދާރާއިން ވަނީ ވިދާޅުވެފައެވެ.

ފުލުހުންގެ އިދާރާއިން ނެރުނު ނޫސްބަޔާނުގައި ވިދާޅުވީ، އާދިއްތަ ދުވަހުގެ ނޫސް ކޮންފަރެންސްގައި ބައެއް ސެންސިޓިވް ވާހަކަތައް އެންމެ ރަނގަޅު ނޫން ގޮތުގައި ގެނެސްދެވުނުކަން ފުލުހުންގެ ޚިދުމަތުން ފަރާތުން ގަބޫލުކޮށް، އެކަމަށް އެންމެހައި ފަރާތްތަކުގެ ކިބައިން ނިހާޔަތަށް މައާފަށް އެދޭ ކަމަށެވެ.