ރާއްޖެއަށް ވޭޕް އެތެރެކުުރުން މަނާކުރި އެންމެ ބޮޑު އެއް ސަބަބަކީ، ވޭޕްގެ ނަމުގައި އޮޅުވާލައިގެން މަސްތުވާތަކެތި އެތެރެކުރަމުންދާތީ ކަމުގައި ހޯމް މިނިސްޓަރ ޢަލީ އިޙްސާން ވިދާޅުވެއްޖެއެވެ.

މިނިސްޓްރ ޢިހްސާން އެކްސްގައި ކުރެއްވި ޕޯސްޓެއްގައި ވިދާޅުވީ، ވޭޕް އޮއިލްގެ ނަމުގައި ރާއްޖެއަށް އެތެރެކުރި މަސްުތުވާތަކެތީބެ ބާވަތެއް ކަމުގައިވާ ކެނަބިސް އަޅާފައި ހުރި ޝިޕްމެންޓެއް ކަސްޓަމްސްއިން މިރޭ އަތުލައިގެންފައިވާ ކަމަށެވެ. އަދި  އެއީ ރައީސުލްޖުމްހޫރިއްޔާ ޑރ. މުޙައްމަދު މުއިއްޒު މިއަދު ވޭޕް މަނާކުރެއްވުމަށް ނިންމެވި އެންމެ ބޮޑު އެއް ސަބަބުކަމުގައިވެސް އިޙްސާން ވިދާޅުވިއެވެ.

ވޭޕް މަނާކުރުމަށް ރައީސުލްޖުމްހޫރިއްޔާ ނިންމަވައި މިއަދު އެކަން އިއުލާނުކުރެއްވުމާއި އެކު ވަަރަށް ގިނަ ފަރާތްތަކަކުން ވަނީ އެކަމަށް މަރުޚަބާ ދަންނަވާފައެވެ. 

ރައީސުލްޖުމްހޫރިއްޔާ މިއަދު ނިންމަވާފައި ވަނީ، ވޭޕްކުރުމަށް ބޭނުންކުރާ ތަކެއްޗާއި، އެ ތަކެތީގެ ވަކިވަކި ބައިތައް ދިވެހިރާއްޖެއަށް އެތެރުކުރުން 15 ނޮވެމްބަރ 2024 އިން ފެށިގެން މަނާ ކުރުމަށެވެ. އަދި ދިވެހިރާއްޖޭގައި ވޭޕްކުރުމަށް ބޭނުންކުރާ ތަކެތި ބޭނުންކުރުމާއި، ގެންގުޅުމާއި، އުފެއްދުމާއި، ވިއްކުމާއި، ރާއްޖޭގައި އިޝްތިހާރު ކުރުމާއި ހިލޭބެހުން 15 ޑިސެމްބަރ 2024 އިން ފެށިގެން މަނާކުރުމަށް ނިންމަވައި، އެކަމަށްޓަކައި ކުރަންޖެހޭ އެންމެހައި ކަންކަން ކުރެއްވުމަށްވެސް ރައީސުލްޖުމްހޫރިއްޔާއި މިއަދު ވަނީ ކަމާގުޅުން ހުރި އިދާރާތަކަށް އަންގަވާފައެވެ.