ރާއްޖޭގައި ވޭޕް މަނާކުރެއްވުމަށް ނިންމަވައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެކަން މިއަދު އިޢުލާނުކުރައްވައިިފިއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެކްސްގައި ކުރެއްވި ޕޯސްޓެއްގައި ވިދާޅުވީ، ވޭޕްކުރުމަށް ބޭނުންކުރާ ތަކެއްޗާއި، އެ ތަކެތީގެ ވަކިވަކި ބައިތައް ދިވެހިރާއްޖެއަށް އެތެރުކުރުން 15 ނޮވެމްބަރ 2024 އިން ފެށިގެން މަނާ ކުރުމަށާއި، ދިވެހިރާއްޖޭގައި ވޭޕްކުރުމަށް ބޭނުންކުރާ ތަކެތި ބޭނުންކުރުމާއި، ގެންގުޅުމާއި، އުފެއްދުމާއި، ވިއްކުމާއި، ރާއްޖޭގައި އިޝްތިހާރު ކުރުމާއި ހިލޭބެހުން 15 ޑިސެމްބަރ 2024 އިން ފެށިގެން މަނާކުރުމަށް ކުރަންޖެހޭ އެންމެހާ ކަންކަން ކުރުމަށް ކަމާބެހޭ ފަރާތްތަކަށް މިއަދު އެމަނިކުފާނު އަންގަވާފައިވާ ކަމަށެވެ.

ރައީސުލްޖުމްހޫރިއްޔާ މިނިންމުން ނިންމަވާފައި މިވަނީ، ރާއްޖޭގައި ވޭޕް މަނާކުރުމަށް ޑޮކްޓަރުންނާއި ޞިއްޙީ ދާއިރާގެ ތަޖުރިބާކާރުންނާއި ޖަމިއްޔާ ޖަމާޢަތްތަކުންވެސް ގޮވާލާފައި ވަނިކޮށެވެ.

ދުންފަތުގެ އިސްތިއުމާލު ކުރުމަށް ބޭނުންކުރާ ބާވަތްތަކުގެ ތެރެއިން ވޭޕަކީ، ފުއްޕާމެއަށް އެންމެ ބޮޑަށް ގެއްލުންދޭ ބާވަތެވެ.