އިލެކްޝަންސް ކޮމިޝަންގެ މެމްބަރުކަމަށް ޢައްޔަނު ކުރެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ހުޅުމާލެ ހިޔާ، 11-23-05 ޢަބްދުލް ޙަސީބު ޢިސްމާއީލްގެ ނަންފުޅު ރައްޔިތުންގެ މަޖިލީހަށް ހުށައަޅުއްވައިިފިއެވެ.

އިލެކްޝަންސް ކޮމިޝަންގެ މެންބަރުކަމުގެ މަގާމަށް ކުރިމަތިލެއްވުމަށް އިޢުލާނުކުރެއްވުމުން އެކަމަށް އިޖާބަދެއްވި އެހެން ބޭފުޅުންގެ ނަންތައްވެސް ރައީސުލްޖުމްހޫރިއްޔާ ވަނީ ރައްޔިތުންގެ މަޖިލީހަށް ފޮނުއްވާފައެވެ.

ޢަބްދުލްޙަސީބު މިހާރު ހުންނެވީ، އިލެކްޝަންސް ކޮމިޝަނުގެ އެސިސްޓެންޓު ޑިރެކްޓަރުގެ މަގާމުގައެވެ. މީގެ ކުރިން އޭނާ ވަނީ މިނިސްޓްރީ އޮފް އިސްލާމިކް އެފެއާޒުގައިވެސް މަސައްކަތް ކުރައްވާފައެވެ.

އިލެކްޝަންސް ކޮމިޝަންގެ މެމްބަރުކަމުގެ މަޤާމަށް ބޭފުޅަކު ޢައްޔަނު ކުރައްވަނީ، އެކޮމިޝަންގެ މެމްބަރުންގެ ތެރެއިން، ކޮމިޝަންގެ ރައީސް ކަމުގެ މަޤާމުގައި މިހާރު ހުންނެވި ފުވާދު ތައުފީޤުގެ ދައުރު ހަމަވާތީއެވެ. އިލެކްޝަންސް ކޮމިޝަންގެ ޤަާނޫނުގައިވާ ގޮތުގައި ކޮމިޝަންގެ މެމްބަރެއްގެ މެމްބަރު ކަމުގެ ދައުރަކީ މީލާދީ 5 އަހަރެވެ.