ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެމެރިކާއަށް ކުރެއްވި ދަތުރުފުޅަށް ޚަރަދުވީ 2.4 މިލިޔަން ރުފިޔާ ކަމުގައި ރައީސުލްޖުމްހޫރިއްޔާގެ އޮފީހުން ހާމަކުރައްވައިފިއެވެ.

ރައީސުލްޖުމްހޫރިއްޔާގެ އޮފީހުން ހާމަކުރައްވާފައިވާ ގޮތުގައި، އދ. ގެ 79 ވަނަ އަހަރީ އާންމު ޖަލްސާގައި ބައިވެރިވެވަޑައިގަތުމަށް އެމެރިކާގެ ނިއުޔޯކަށް ރައީސް ޑރ. މުހައްމަދު މުއިއްޒު ކުރެއްވި ދަތުރުފުޅަށް ޚަރަދުވެފައި ވަނީ ޖުމުލަ، 2,455,583/01ރ. (ދެ މިލިޔަން ހަތަރު ލައްކަ ފަންސާސްފަސްހާސް ފައްސަތޭކަ އައްޑިހަ ތިންރުފިޔާ އެއްލާރި) އެވެ. 

އެހެން ނަމަވެސް މިދަތުރުގައި ރައީސުލްޖުމްހޫރިއްޔާގެ އަރިހުގައި ވަޑައިގެންނެވި ވަފުދުގެ ބޭފުޅުންގެ އަދަދެއް ސަރުކާރުން ހާމައެއް ނުކުރައްވައެވެ. އަދި ހާމަކުރައްވާފައި ވަނީ ޚަރަދުތަކުގެ ޖުމުލައެވެ. ޚަރަދުތަފްސީލެއް ހާމައެއް ނުކުރައްވައެވެ.

އެންމެ ފުރަތަމަ ރައީސްގެ ދަތުރުފަތުރުތަކާއި ގުޅޭ ގޮތުން ތަފްސީލްތައް ހާމަކުރައްވަން ފެއްޓެވި އިރު، ޓިކެޓާއި އެކަމަޑޭޝަން ޚަރަދުތަކާއި ޕޮކެޓްމަނީ އާއި އިންސިޑެންޝަލް ޚަރަދަށް ކަނޑައެޅި ފައިސާގެ އަދަދުތައްވެސް ތަފްސީލްކޮށް ހިމަނުއްވާފައިވެއެވެ. އެހެން ނަމަވެސް މިފަހުން އެތަފްސީލްތައް ނުހިމަނުއްވައި ހާމަކުރައްވަނީ ޖުމުލަ އަދަދެކެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެމެރިކާއަށް ކުރެއްވި ދަތުރުފުޅުގެ ޚަރަދު އޭގެ ކުރިން ސަރުކާރުން އެދަތުރުފުޅަށް ކުރައްވާފައިވާ ޚަރަދާއި އަޅާބަލާއިރު ދެގުނަ ކުޑަވެފައިވާކަމަށްވެސް ރައީސުލްޖުމްހޫރިއްޔާގެ އޮފީހުން ހާމަ ކުރައްވާފައިވެއެވެ.