އިޒްރާއީލުގެ އަސްކަރީ މަރުކަޒަކަށް އަމާޒުކޮށް ހިޒްބުﷲއިން މިރޭ ދިން ހަމަލާއެއްގައި އިޒްރާއީލްގެ އަސްކަރިއްޔާގެ ޗީފް އޮފް ސްޓާފް ހާރޒީ ހަލެވީ މަރާލެވިއްޖެކަމަށް ހިޒްބުﷲގެ ޚަބަރުތައް ގެނެސްދޭ ބައެއް ޗެނަލްތަކުން ބުނެފިއެވެ.

އިޒްރޭލުންވެސް ވަނީ، ހިޒްބުﷲގެ ޑްރޯން ހަމަލާއެއް އިޒްރޭލުގެ އަސްކަރީ މަރުކަޒަކަށް އަމާޒުވެ، 67 ސިފައިން ޒަޚަމްވެފައިވާ ކަމަށް ބުނެފައެވެ. އެހެން ނަމަވެސް އެ ހަމަލާގައި އިޒްރޭލު އަސްކަރިއްޔާގެ ޗީފް އޮފް ސްޓާފް މަރުވިކަން ނުވަތަ ނޫންކަން އިޒްރޭލުން އަދި ހާމައެއް ނުކުރެއެެވެ. މިހާދިސާގައި މަދުވެގެން 67 މީހުން މަރުވެ ނުވަތަ ޒަޚަމްވެފައިވާ ކަމަށް ބެލެވިފައި ވާއިރު، މިއީ އިޒްރާއީލުގެ އަސްކަރިއްޔާއަށް އަމާޒުކޮށް ލުބުނާނުގެ ހިޒްބުﷲ ހަނގުރާމަވެރިން ދިން އެންމެ ވަރުގަދަ ހަމަލާއެވެ.

މީޑިއާ ރިޕޯޓްތައް ބުނާ ގޮތުގައި ހަމަލާ އަމާޒުވި އަސްކަރީ މަރުކަޒަކީ، ހައިފާގެ ދެކުނުން، ގޯލާން ސަރަހައްދުގައި އޮންނަ ބިންޔާމީނާ ނަމަކަށް ކިޔާ އަވަށުގައި ހަދާފައިވާ އަސްކަރީ ޓްރޭނިން ކޭމްޕެކެެވެ. ހަމަލާ އަމާޒުވީ، އިޒްރޭލު އަސްކަރިއްޔާގެ ޗީފް އޮފް ސްޓާފް އޮފިސަރުންނާއި އެކު ރޭގަނޑުގެ ކެއުމަށް ޖަމާވެތިބި ހޯލަށް ކަމަށްވެސް ވަނީ ރިޕޯޓްކޮށްފައެވެ.

ހަމަލާގައި ޒަޚަމްވި މީހުންނަށް ހައިފާގެ ހޮސްޕިޓަލްތަކުގައި ފަރުވާދެމުން އަންނައިރު އެމީހުންގެ ތެރެއިން ބައެއް މީހުންގެ ހާލު ވަރަށް ސީރިއަސްކަމަށްވެސް ހޮސްޕިޓަލްތަކާއި ހަވާލާދީ ސީއެންއެން އިން ރިޕޯޓްކޮށްފައިވެއެވެ.