ބާކައުންސިލުން ބޭއްވި މިއަހަރުގެ ބާ އިމްތިހާނުގައި 183 ކެންޑިޑޭޓުން ބައިވެރިވެ އިމްތިހާނު ހަދާފައިވާކަމުގައި، ބާ ކައުންސިލުން ހާމަކޮށްފިއެވެ.

މިއަހަރުގެ ބާ އިމްތިހާން ބާއްވާފައި ވަނީ، މިއަދު ހެނދުނު، ވިލާ ކޮލެޖުގެ ހޯލުގައެވެ. މިއަހަރު އެ އިމްތިހާނަށް ހުޅުވާލި އިރު ޖާގަ ދިނުމަށް ނިންމާފައި އޮތީ 190 ކެންޑިޑޭޓަކަށެވެ. އޭގެ ތެރެއިން އިމްތިހާނުގައި ބައިވެރިވެފައި ވަނީ 183 ކެންޑިޑޭޓުންނެވެ. 2022 ވަނަ އަހަރު ބާއްވަންފެށި ބާއިމްތިހާނުގައި މިހާތަނަށް 505 ކެންޑިޑޭޓަކު ބައިވެރިވެފައިވާކަމުގައި ބާކައުންސިލުން ހާމަކުރައްވާފައިވެެއެވެ. 

ބާ އިމްތިހާނަކީ، ޝަރީއާ އާއި ޤާނޫނީ ދާއިރާއިން ކިޔަވާފައިވާ ދަރިވަރުން ޤާނޫނީ ވަކީލެއްގެ ގޮތުގައި މަސައްކަތް ފެށުމަށް ހަދަންޖެހޭ އިމްތިހާނެކެވެ. ޤާނޫނީ ވަކީލެއްގެ ގޮތުގައި މަސައްކަތް ކުރުމަށް ދޭ ހުއްދަ ލިބޭނީ އެ އިމްތިހާނުން ފާސްވެގެންނެވެ.

މިއަހަރުގެ ބާ އިމްތިހާން ބާއްވާފައި ވަނީ، ދިވެހި ސަރުކާރާއި، ޔޫ.އެސް.އައި.ޑީ އަދި އެމެރިކަން ބާ އެސޯސިއޭޝަންގެ އެހީތެރިކަމާއި އެކުގައި ކަަމަށް ބާ ކައުންސިލުން ވަނީ ހާމަކޮށްފައެވެ.