އެމްޑީޕީގެ ހިންގުމަށް ގެންނަ ބަދަލުތަކުގެ ތެރެއިން މާލީ ފުދުންތެރިކަން އިތުރު ކުރުމަށް ގެނައުމަށް ނިންމާފައިވާ ބަދަލަކީ، އެކަމަށް ވަރަށް ބޮޑަށް ތާޢީދުކުރައްވާ ބަދަލެއް ކަމުގައި އެމްޑީޕީގެ، އެޑްވައިޒަރ އަދި ކުރީގެ ރައީސް އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، ދިވެހިރައްޔިތުންގެ ޑިމޮކްރަޓިކް ޕާޓީ (އެމްޑީޕީ) ގެ ފަރާތުން ލާމަރުކަޒީ ނިޒާމުގެ ދިފާއުގައި ބާއްވާ، ލާމަރުކަޒީ ގުޅުން، ކައުންސިލަރުންގެ ކޮންފަރެންސް އިފްތިތާޙްކުރުމުގެ ޖަލްސާގައި ދެއްކެވި ވާހަކަފުޅުގައެވެ.

ރައީސުލްޖުމްހޫރިއްޔާގެ ވާހަކަފުޅުގައި ވިދާޅުވީ، އެމްޑީޕީއަށް ގެންނަ އެންމެ މުހިއްމު ބަދަލަކީ އެއީ ކަމަށެވެ. އަދި ވެރިކަމުގައި ޕާޓީ އޮންނައިރުގައި، ވަރަށް ފަސޭހައިން މީހުން އެހީތެރިކަން ފޯރުކޮށްދޭ ކަމަށާއި، އަދި އަމިއްލައަށް އެދިގެން އައިސްވެސް ޕާޓީއަށްދޭ ކޮންޓްރިބިއުޝަނެއްގެ ގޮތުގައި ފައިސާ ހަވާލުކުރާ ކަމުގައި ރައީސް ޞާލިޙް ވިދާޅުވިއެވެ.

ރައީސް ޞާލިޙް ވިދާޅުވީ، އިދިކޮޅުގައި އޮންނަ ޕާޓީއަކަށް އެހީއެއް ފޯރުކޮށް ދިނުމަކީ، ބިރުވެރިކަމަކަށް ވެފައި އޮންނަކަމަށާއި، އޭގެ ސަބަބުން އިދިކޮޅުގައި އޮންނަ އިރުގައި އިންތިޚާބުތަކަށް ކުރިމަތިލާއިރު ކުރަންޖެހޭ ޚަރަދުތަކާއި ޕާޓީ ހިންގުމުގެ ޚަރަދުތައް ކުރުން ވެފައި އޮންނަނީ ދަތި އުނދަގުުލަކަށް ކަމަށެވެ. އެހެންވެ ޕާޓީއަށް އާމްދަނީ އިތުރުުކުރެވޭނެ މަސައްކަތްތައް ކުރުމަކީ، ވަަރަށް ރަނގަޅު ނިންމުމެއް ކަމުގައި ރައީސް ޞާލިޙް ވިދާޅުވިއެވެ. އަދި އެކަމުގެ ސަބަބުން ޕާޓީއަށް ހެޔޮ ބަދަލު އަންނާނޭ ކަމުގައިވެސް ރައީސް ޞާލިޙް ވިދާޅުވިއެވެ. އަދި އެކަމުގެ ސަބަބުން ޕާޓީއަކީ އެންމެންގެ ޕާޓީއަކަށް ވެގެން ދާނެ ކަމުގައިވެސް ރައީސް ޞާލިޙް ވިދާޅުވިއެވެ.

ރައީސް ޞާލިޙް ވިދާޅުވީ، އެމްޑީޕީއަށް މިގެނެވޭ ބަދަލުތަކާއި އެކީގައި، ޕާޓީ ހިންގަން ތިބޭ މީހުން ބަދަލުވެގެން ދިޔަނަމަވެސް ޕާޓީ ކުރިޔަށްދާނެ ކަމަށެވެ. އެހެންކަމުން މިހާރު އެމްޑީޕީއަށް ގެންނަން ހުށައަޅާފައިވާ ބަދަލުތަކަކީ، ރަނގަޅު ހެޔޮބަދަލުތަކެއް ކަމުގައިވެސް ރައީސް ޞާލިޙް ވަނީ ވިދާޅުވެފައެވެ.