އިންޑިއާގެ އެންމެ ބޮޑެތި ވިޔަފާރިތަކުގެ ތެރޭގައި ހިމެނޭ ޓާޓާގެ އެއްބާނީ، ރަތަން ޓާޓާ އުމުރުން 86 އަހަރުގައި މަރުވެއްޖެއެވެ.

ރަތަން ޓާޓާ މަރުވީ އިއްޔެ އޭނާ އާއި އޭނާގެ އާއިލާ ދިރިއުޅެމުން އަންނަ އިންޑިއާގެ ވިޔަފާރީގެ މަރުކަޒީރަށް މުމްބާއީގައެވެ.

ރަތަން ޓާޓާއަކީ، ޓާޓާކުންފުންޏަކީ ބައިނަލްއަޤުވާމީ ކުންފުންޏަކަށް ހަދައި އާއިލީ އެކުންފުނި ދުނިޔޭގެ ނަންހިނގާ ކުންފުންޏަކަށް ހެދި ފަރާތެވެ. ކުރިން ޓިސްކޯގެ ނަމުގައި ހިންގަމުން އައި ވިޔަފާރީގައި 1962 ވަނަ އަހަރު ޢަމަލީ ގޮތުން މަސައްކަތް ފައްޓަވައި، ޓާޓާ ކޮމްޕެނީގެ ގޮތުގައި އޭނާ އެކުންފުނި ފުޅާކުރެއްވީ، 1991 ވަނަ އަހަރުންފެށިގެންނެވެ. 

ޓާޓާ ކުންފުންޏަކީ، މިއަދު ރިއަލްއެސްޓޭޓް ވިޔަފާރިއާ މުވާޞަލާތީ ވިޔަފާރިއާއި ސޮފްޓްވެއާ އާއި ހާޑުވެއާ އަދި ވެހިކަލްތައް އުފައްދާ ކުންފުނިތައްވެސް ހިންގަމުން އަންނަ ބޮޑު ކުންފުންޏެކެވެ.

ރަތަން ޓާޓާ މަރުވުމާއި ގުޅިގެން، އިންޑިއާގެ މިހާރުގެ ބޮޑުވަޒީރު ނަރެންދުރަ މޯދީވެސް ވަނީ، އެ އާއިލާއަށް ތަޢުޒިޔާފޮނުއްވާފައެވެ. މޯދީގެ ތަޢުޒިޔާގެ މެސެޖުގައި ވިޔަފާރިއާ އިޤުތިޞާދީ ދާއިރާއިން ރަތަން ކުރައްވާފައިވާ ޚިދުމަތްތައް ފާހަގަކުރައްވާފައި ވެއެެވެ. 

ރަތަން ޓާޓާ އުފަންވީ، 1937 ވަނަ އަހަރު އިންޑިއާގެ ބޮމްބޭއަށެވެ. އަދި އޭނާ އެމެރިކާގައި ޒުވާން ދުވަސްވަރު ދިރިއުޅުއްވުމަށްފަހު އަނބުރާ އިންޑިއާއަށް އައިސް އާއިލީ ވިޔަފާރިއާ ގުޅުނީ، 1962 ވަނަ އަހަރުގައެވެ.

ޓާޓާ ކުންފުނީގެ އަހަރީ އާމްދަނީ މިހާރު އަހަރަކު، 100 ބިިލިއަން ޑޮލަރަށްވުރެ މައްޗެވެ.