އިންޑިއާއަށް ކުރެއްވި 5 ދުވަހުގެ ފުރަމާނަ ދަތުރުފުޅު ނިންމަވާލެއްވުމަށްފަހު، ރައިސުލްޖުމްހޫރިއްޔާ ޑރ. މުޙައްމަދު މުޢިއްޒާއި އެމަނިކުފާނުގެ އަނބިކަނބަލުން، ސާޖިދާ މުޙައްމަދު އިންޑިއާއިން ފުރާވަޑައިގެންފިއެވެ.

ރައީސުލްޖުމްހޫރިއްޔާގެ ދެކަނބަލުން ރާއްޖެއަށް ވަޑައިގެންނެވުމަށްޓަަކައި އިންޑިއާއިން ފުރާވަޑައިގެންނެވީ، ބެންގަލޫރު އެއާޕޯޓުންނެވެ.

ފުރަމާނަދަތުރުފުޅުގައި އެންމެ ފަހުން އިއްޔެ ރައީސުލްޖުމްހޫރިއްޔާ ވަޑައިގެންނެވީ ބެންގަލޫރަށެވެ. ބެންގަލޫރަކީ، ގިނަ އަދަދެއްގެ ދިވެހިން ދިރިއުޅޭ ސިޓީއެކެވެ. ރައީސުލްޖުމްހޫރިއްޔާގެ ދެކަނބަލުން ރޭ ވަނީ އިންޑިއާގެ ބެންގަލޫރުގައި ދިރިއުޅޭ ދިވެހިންނާއިވެސް ބައްދަލުކުރައްވާފައެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒާއި އަނބިކަނބަލުން ސާޖިދާ މުޙައްމަދު އާދީއްތަ ދުވަހު އިންޑިއާއަށް ވަޑައިގެންނެވީ، އިންޑިއާގެ ރައީސާ ދުރޫޕަތީ މުރޫމުގެ ދައުވަަތަކަށެވެ.