މިއަހަރުގެ މިހާތަނަށް، ލައްކައެއްހައި ފަތުރުވެރިން ރާއްޖެއަށް ޒިޔާރަތްކޮށްފައިވާ ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، އިންޑިއާގެ ވިޔަފާރީގެ މަރުކަޒީރަށް މުމްބާއީގައި ބޭއްވި މޯލްޑިވްސް-އިންޑިއާ ބިޒްނަސް ފޯރަމްގައި ބައިވެރިވެވަޑައިގެން ދެއްކެވި ވާހަކަފުޅުގައެވެ.

ރައީސުލްޖުމްހޫރިއްޔާގެ ވާހަކަފުޅުގައި ވަނީ، ދިވެހިރާއްޖޭގައި މިހާރު ފަހިވެފައިވާ އިންވެސްޓްމަންޓް ފުރުޞަތުތަކަކީ، އިޤްތިޞާދު ސިންދަފާތުކޮށް، ދެމެހެއްޓެނިވި ކުރިއެރުން ގެނައުމަށް ދިވެހިރާއްޖެ ދެކޭ ތަޞައްވުރަށް ބާރުދޭ ފަދަ ފުރުޞަތުތަކެއް ކަމުގައި ވިދާޅުވެފައެވެ. މިގޮތުން ޚާއްޞަ އިޤްތިޞާދީ ސަރަޙައްދުތަކުގައްޔާއި، ލަގްޒަރީ ޕްރައިވެޓް އައިލެންޑްތަކުގައްޔާއި، ތިމާވެއްޓާ ރަޙުމަތްތެރި ރިސޯޓާއި އިންޓަގްރޭޓަޑް ޓުއަރިޒަމުގެ މަޝްރޫޢުތަކުގައި އިންވެސްޓުކުރުމަށް ހުރި ފުރުޞަތުތައް ރައީސުލްޖުމްހޫރިއްޔާގެ ވާހަކަފުުޅުގައި ފާހަގަކުރެއްވިއެވެ.

މިއަހަރުއެކަނިވެސް ލައްކައަކާއި ގާތްކުރާ އަދަދަކަށް ރާއްޖެއަށް އިންޑިއާ ފަތުރުވެރިން ޒިޔާރަތްކޮށްފައިވާކަން ފާހަގަކުރައްވައި ރައީސުލްޖުމްހޫރިއްޔާ ވިދާޅުވީ، އެއީ ދެޤައުމުގެ ދެމެދުގައި އޮތް ގުޅުންތަކުގެ ސަބަބުން ހޯދެމުން އަންނަ ކުރިއެރުންކަމަށެވެ. އަދި އިންޑިއާއަކީ ރާއްޖޭގެ ފަތުރުވެރިކަމުގައި އެންމެ މުހިއްމު އެއް މާކެޓުކަންވެސް އެމަނިކުފާނު ފާހަގަކުރެއްވިއެވެ.

ރައީސުލްޖުމްހޫރިއްޔާ އިންޑިއާއަށް ކުަރައްވާ ފުރަމާނަ ދަތުރުފުުުޅުގައި ރާއްޖެއިން ފުރާވަޑައިގެންނެވީ އޮކްޓޯބަރު މަހުގެ 6 ވަނަ ދުވަހުގައެވެ. އެދުވަހާއި ހަމައަށް، ރާއްޖެއަށް އިންޑިއާއިން 92،270 ފަތުރުވެރިން ރާއްޖެއަށް އައިސްފައި ވެއެވެ. އިންޑިއާ މިހާރު އޮތީ ރާއްޖެއަށް 6 ވަނައަށް އެންމެ ގިނަ ފަތުރުވެރިން އަންނަ ޤައުމުގެ ގޮތުގައެވެ. 

އިންޑިއާއިން ރާއްޖެއަށް އަންނަ ފަތުރުވެރިންގެ އަދަދު މިއަހަރު މަދުވެގެން ދިޔައީ، ޖެނުއަރީ މަހުގެ ތެރޭގައި ސަރުކާރުގެ އިސްމަޤާމުތަކުގައި ތިއްބެވި ތިން މީހަކު، އިންޑިއާގެ ބޮޑުވަޒީރު ނަރެންދުރަ މޯދީއަށް ފުރައްސާރަކޮށް ސޯޝަލްމީޑިއާގައި ކުރި ޕޯސްޓްތަކާއި ގުޅިގެން، ދެޤައުމުގެ ރައްޔިތުންގެ މެދުގައި އުފެދުނު ހިތްހަމަ ނުޖެހުންތަކުގެ ތެރޭގައެވެ. އެކަމުގެ ތެރޭގައި ބޮލީވުޑްގެ މަޝްހޫރު ބައެއް ސުޕަރ ސްޓާރުންވެސް އިންޑިއާއިން ރާއްޖެއާ ދެކޮޅަށް ހިންގި ބޮއިކޮޓް ކެމްޕޭންތަކުގައި ބައިވެރިވިއެވެ. އެކަމުގެ ސަބަބުން އިންޑިއާ މާކެޓް މިއަހަރު ވަރަށް ބޮޑަށް ދަށަށް ދިޔައެވެ.