ސޮނާކްޝީ އަދި ޝިލްޕާޝެޓީ ހިމެނޭހެން ބޮލީވުޑްގެ ބައެއް ތަރިންނާއި ރައީސުލްޖުމްހޫރިއްޔާގެ ދެ ކަނބަލުން ބައްދަލު ކުރައްވައިފިއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒާއި އަނބި ކަނބަލުން ސާޖިދާ މުޙައްމަދު ބޮލީވުޑުގެ މަޝްހޫރު ބައެއް ތަރިންނާއި ބައްދަލުކުރައްވާފައި ވަނީ، އިއްޔެ މުމްބާއީގައި ކުރިޔަށް ގެންދިޔަ "މޯލްޑިވްސް-އިންޑިއާ ނެޓްވަރކިންގ އީވްނިންގ" ހަރަކާތުގެ ތެރެއިންނެވެ. މިހަރަކާތަކީ، އެމްއެމްޕީއާރްސީއާ ޓޫރިޒަމް މިނިސްޓްރީން އިންތިޒާމްކޮށްގެން ރާއްޖޭގެ ފަތުރުވެރިކަން ޕްރޮމޯޓްކުރުމަށްޓަކައި ކުރިޔަށް ގެންދިޔަ ހަރަކާތެކެވެ. މިއީ، ރާއްޖޭގައި ފަތުރުވެރިކަމުގެ ދާއިރާއިން އިންވެސްޓްކުރުމަށް ހުރި ފުރުޞަތުތައް އަންގައިދިނުމުގެ ގޮތުން ކުރިޔަށް ގެންދިޔަ ހަރަކާތެއް ކަމުގައި، ރައީސުލްޖުމްހޫރިއްޔާގެ އޮފީހުން ވަނީ ވިދާޅުވެފައެވެ.

މީގެ އިތުރުން މުމްބާއީގައި އިއްޔެ ވަނީ، އިންޑިއާ މޯލްޑިވްސް ބިޒްނަސް ފޯރަމްވެސް ބާއްވާފައެވެ.

"މޯލްޑިވްސް-އިންޑިއާ ނެޓްވަރކިންގ އީވްނިންގ"ގައި ބައިވެރިވި މަޝްހޫރު ސްޓާރުންނަކީ، 90ގެ އަހަރުތަކާއި 2000ގެ ކުރީކޮޅު ހިންދުސްތާން ފިލުމްތަކުން ވިދާލި ތަރިންނެެވެ. އޭގެ ތެރޭގައި، ކަރިޝްމާ ކަޕޫރާއި، ސޮނާކްޝީ އާއި ޝިލްޕާ ޝެޓީ އާއި އަރްބާޒް ޚާން ފަދަ ސުޕަރ ސްޓާރުން ހިމެނެއެވެ. 

ރައީސުލްޖުމްހޫރިއްޔާ އިންޑިއާއަށް ކުރައްވަމުންގެންދަވާ ފުރަމާނަ ދަތުރުފުޅު ނިންމަވާލެއްވުމަށްފަހުގައި މާލެ ވަޑައިގަންނަވާނީ މާދަމާއެވެ.