ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށް ސޯޝަލް މީޑިއާ އެކައުންޓަކުން މަރުގެ އިންޒާރުދިން މައްސަލައިގައި ތުހުމަތު ކުރެވޭ މީހާ ހައްޔަރުކޮށްފިއެވެ.

ފުލުހުންގެ އިދާރާއިން ހާމަކޮށްފައިވާ ގޮތުގައި އެމައްސަލައިގައި ހައްޔަރުކޮށްފައި ވަނީ، ގ. ސަންސަންގެއާގޭ ޢަބްދުﷲ މިޢާދު ޔޫސުފެވެ. އޭނާ ހައްޔަރުކޮށްފައި ވަނީ، މިރޭ އިންޑިއާއިން މާލެ އައިތަނުން އެއާޕޯޓުންނެވެ.

މިޢާދު މިރޭ މާލެ އައީ ދިގު މުއްދަތެއް ވަންދެން އިންޑިއާގައި ހުރުމަށްފަހުގައެވެ. އޭނާގެ ނަފްސާނީ ސިއްޙީ ޙާލަތު ގޯސްވެގެން  މިއޮކްޓޫބަރު މަހު އިންޑިއާގައި ނަފްސާނީ ބައްޔަށް ފަރުވާދޭ ހޮސްޕިޓަލެއްގައި އެޑްމިޓްކޮށް ފަރުވާދީފައިވާ ކަމުގައިވެސް މައުލޫމާތު ލިބިފައި ވެއެވެ. އެނގިފައިވާ ގޮތުގައި މިރޭ ފުލުހުން މިއާދު ހައްޔަރު ކުރުމާއި އެކު އާއިލާއިން ވަނީ އޭނާގެ ނަފްސާނީ ސިއްޙީ ހާލަތާއި، ޑޮކްޓަރުގެ ލިޔުންތައް ފުލުހުންނާއި ހަވާލުކޮށްފައެވެ.

މިއާދު ފުލުހުންގެ ބެލުމުގެ ދަށަށް ގެންދިޔައީ ކޯޓުއަމުރެއްގެ ދަށުންކަމެއް ނުވަތަ ނޫންކަމެއް ފުލުހުން ހާމައެއް ނުކުރެއެވެ. 

އެމްޑީޕީގެ ވެރިކަމުގެ ދުވަސްވަރު، ޕީޕީއެމްގެ ސަޕޯޓަރަކުވެސް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހަށް މަރުގެ އިންޒާރުދިން މައްސަަލައިގައި ހައްޔަރުކުރިއެވެ. އެކަމަކު ފަހުން އެމީހާ ވަނީ ބަންދުން ދޫކޮށްލާފައެވެ.