ދިވެހިންގެ މަޤުބޫލު ފަރުމާތަކަށް ގަހަނާ ތައްޔާރު ކުރުމުގައި މަޝްހޫރުކަން ހޯދަމުން އަންނަ، ހާރަ "ހައުސް އޮފް ޖުވެލް"ގެ ދެވަނަ އައުޓްލެޓެއް ރޭ މާލޭގައި ހުޅުވައިފި އެވެ.

މިފިހާރަ ހުޅުވާފައި ވަނީ ރޭ، ފަރީދީ މަގުގައި، މަޝްހޫރު އިލެކްޓްރޯނިކްސް ފިހާރަ މޮނަލާލްސްގެ ކުރިމަތި އެމަގުގެ އަނެއް ފަރާތުގައި ހުންނަ އިމާރާތެއްގައެވެ. 

"ހައުސް އޮފް ޖުވެލް"އަކީ، ރިހި ގަހަނާއަށް ޚާއްޞަ ފިހާރައެކެވެ. އެހެން ނަމަވެސް އެފިހާރައިން ރަނުގެ ގަހަނާ އާއި ރިހި އަތު ކުރިގަޑިވެސް ލިބެން ހުންނާނެއެވެ.

"ހައުސް އޮފް ޖުވެލް" ވެރިޔާ، ޙަސަން ނިޔާޒް ރަޝީދު ވިދާޅުވީ، ރާއްޖޭގެ އެންމެ ބޮޑު ސިލްވަރ ކަލެކްޝަން އޮތީ އެފިހާރައިގައި ކަމަށެވެ.

މީގެ އިތުރުން އެފިހާރަ ޚާއްޞަވާ އެންމެ މުހިއްމު އެއްކަމަކީ ދިވެހިރާއްޖޭގެ ރަސްކަމުގެ ދުވަސްވަރު ބޭނުންކުރި ފައިސާގެ ކަލެކްޝަންވެސް އެތަނުގައި ހުރުމެވެ. އަދި އެއިން ފައިސާފޮއްޗެއް ގަނެގެން އެ ބޭނުންކޮށް ގަހަނާ ހަދަން ބޭނުންވާ ފަރާތްތަކަށް އެފިހާރައިން އެފުރުޞަތުވެސް ލިބިގެންދާނެއެވެ. 

އިހުގެ ފައިސާ ބޭނުންކޮށްގެން ހަދާފައިވާ ކަންފަތުލާއެއްޗެއް --

މީގެ އިތުރުން ކަސްޓަމަރުން ބޭނުންވާ ޑިޒައިނަކަށް އަދި ބޭނުންވާ މައުދަނަކުން މިތަނުން ގަހަނާ ހަދައިދޭނެވެ. އަދި މި ފިހާރައިގައި ރަންރިހީގެ މަސައްކަތްކޮށްދޭން ތިބޭނީވެސް އަތްކަންކުރާ ދިވެހީން ކަމުގައި، ނިޔާޒް ފާހަގަކުރެއްވިއެވެ.

އަތްކަން ކުރުމަކީ، ރާއްޖޭގެ ޤަދީމީ ފަންނުވެރި މަސައްކަތެވެ. އެމަސައްކަތުގައި ދިވެހިންގެ ޚާއްޞަ ޑިޒައިންތައްވެސް ހިމެނޭއިރު، އެޑިޒައިންތައް ދިރުވައި ދެމެހެއްޓުމަކީވެސް ހައުސް އޮފް ޖުވެލްގެ އަމާޒެކެވެ.