އިންޑިއާގެ ރުޕޭކާޑުން ރާއްޖޭގައި ފައިސާގެ މުއާމަލާތްތައް ހިންގޭ ގޮތް ހަދައިފިއެވެ.

އިންޑިއާގެ ރުޕޭކާޑު ރާއްޖޭގައި ބޭނުންކުރަންފެށުން މިއަދު އިފްތިތާޙްކޮށްދެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒާއި، އިންޑިއާގެ ބޮޑުުވަޒީރު ނަރެންދުރަ މޯދީ، ހައިދަރުއާބާދު ހައުސްގައިބޭއްވި ރަސްމީ މަޝްވަރާތަކަށްފަހުގައި ދެއްވި ގުޅިފައިވާ ނޫސްބަޔާނުގެ ކުރިންނެވެ.

ރުޕޭގެ ޚިދުމަތް ފެށުމުގެ ގޮތުން އެންމެ ފުރަތަމަ ޓްރާންސްސެކްޝަން ހަދާަފައި ވަނީ އޯތެންޓިކް މޯލްޑިވްސްގެ ފިހާރައިގައެވެ. މިޚިދުމަތް ރާއްޖޭގައި ފެށުމަށްޓަކައި އެންމެ ފުރަތަމަ އެއްބަސްވުމުގައި ސޮއެކޮށްފައި ވަނީ، 2018 ވަނަ އަހަރު ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް އިންޑިއާއަށް ކުރެއްވި ފުރަމާނަ ދަތުރުފުޅުގެ ތެރެއިންނެވެ. 

ރުޕޭކާޑު މިއަދު ތަޢާރަފްކުރި އިރު، މިއަހަރުގެ މޭމަހު ސަރުކާރުން ވަނީ، ޗައިނާގެ ވީޗެޓު ޕޭގެ ޚިދުމަތްވެސް ރާއްޖޭގައި ތަޢާރަފްކޮށްފައެވެ.

ރުޕޭއަކީ އިންޑިއާއިން 2012 ވަނަ އަހަރު ތަޢާރަފްކުރި ޕޭމެންޓް ގޭޓްވޭއެކެވެ. މިޕޭމެންޓް ގޭޓްވޭ ފަރުމާކޮށްފައި ވަނީ، ދުނިޔޭގެ އެހެން ޤައުމުތަކުގެ ޕޭމެންޓްގޭޓްވޭ ތަކާއި އެކު ޚިދުމަތް ހޯދައި ލިބިގަނެވޭ ގޮތަށެވެ.