އުރީދޫ މޯލްޑިވްސް އިން ކޮންމެ އަހަރަކު ބާއްވާ އުރީދޫ މަސްރޭސް މިއަދު މާލޭގައި ފަށައިފިއެވެ. މާލެއިން 34 ޓީމެއް ވަނީ މި މުބާރާތުގައި ބައިވެރިވެފައެވެ. މިއަހަރުގެ މަސްރޭހަށް ބޮޑު ތަރުހީބެއް ލިބިފައިވާކަމަށް އުރީދޫއިން ބުނެއެވެ. އެގޮތުން ޖުމްލަ 83 ޓީމެއް ވަނީ ރަޖިސްޓަރ ކޮށްފައެވެ.

މަސްރޭސް ފަށާފައިވަނީ މިއަދު މެންދުރު 2:30 ގައެވެ. ޓީމުތައް މަސްވެރިންގެ ޕާކުން މަހަށް ފުރާއިރު، މަސްކިރުމަށް ހުރިހާ ޓީމްތަކުން އުސްފަސްގަނޑަށް މިރޭ 9ގެ ކުރިން އަންނާނެކަމަށް އުރީދޫއިން ބުނެއެވެ. މަސްކިރުމުގެ މަސައްކަތް އުސްފަސްގަނޑުގައި ކުރިއަށް ދާއިރު ހަބޭސް ބޮޑުބެރުގެ ހިތްގައިމު ހަރަކާތްތަށް އުސްފަސްގަނޑު ސަރަހައްދުގައި ކުރިއަށް ދާނެއެވެ.

އުރީދޫ މޯލްޑިވްސްގެ 18 ވަނަ އަހަރީ ދުވަސް ފާހަގަކުރުމުގެ ގޮތުން މަސްރޭސް 2023 ވަނީ މާލެ ސިޓީ، ކުޅުދުއްފުށި ސިޓީ، އައްޑޫ ސިޓީ އަދި ފުވައްމުލައް ސިޓީއަށް ފުޅާކޮށްފަ އެވެ. މުބާރާތް އޮންނާނެ ތާރީހުތައް:

މާލެ ސިޓީ: އޮގަސްޓް މަހުގެ 4 ވަނަ ދުވަހު

ކުޅުދުއްފުށި ސިޓީ: އޮގަސްޓް 11

އައްޑޫ ސިޓީ: އޮގަސްޓް 18

ފުވައްމުލައް ސިޓީ: އޮގަސްޓް 25

މާލެއިން 34 ޓީމު ބައިވެރިވާ އިރު ކުޅުދުއްފުށި ސިޓީން 23 ޓީމާއި އައްޑޫ ސިޓީގެ 13 ޓީމަކާއި ފުވައްމުލައް ސިޓީގެ 13 ޓީމަކާއެކު ކޮންމެ ޓީމެއްވެސް އެ ޓީމެއްގެ ސިޓީގައި ޗެމްޕިއަންކަން ހޯދުމަށް ވާދަކުރާއިރު މުބާރާތުގެ ފޯރި އާއި ވާދަވެރިކަން އެހެން އަހަރުތަކަށް ވުރެ ވަރުގަދަވެގެންދާނެކަމަށް އުރީދޫއިން ބުނެއެވެ.

ޖުމްލަ 160،000 ރުފިޔާގެ އިނާމު ދިނުމަށް ހަމަޖެހިފައިވާއިރު، އޭގެ ތެރޭއިން ކޮންމެ ސިޓީއަކުން މޮޅުވާ ޓީމުތަކަށް  ފައިސާގެ އިނާމު ލިބިގެންދާނެއެވެ. އެގޮތުން؛

އެއްވަނަ ޓީމް: 25،000 ރުފިޔާ

ދެ ވަނަ ޓީމް: 10،000 ރުފިޔާ

3 ވަނަ ޓީމް: 5000 ރުފިޔާ

އެންމެ މޮޅު ފިރިހެން ކެޔޮޅު: 1000 ރުފިޔާ

އެންމެ މޮޅު އަންހެން ކެޔޮޅު: 1000 ރުފިޔާ