އިންޑިއާ ސަރުކާރުގެ އެހީގައި ރާއްޖޭގައި ހިންގާފައިވާ ދެ މަޝްރޫޢެއްގެ ނިމުން ފާހަގަކޮށްފިއެވެ.

މި ދެ މަޝްރޫޢަކީ، ހުޅުމާލެ ފޭސް 2ގައި އިންޑިއާ ސަރުކާރުގެ އެހީގައި އިމާރާތްކުރި 700 ހައުސިންޔުނިޓާއި، އިންޑިއާ ސަރުކާރުގެ އެހީގައި ހިންގި ހަނިމާދޫ އެއާޕޯޓު ތަރައްޤީކުރުމުގެ މަޝްރޫޢެވެ. މިދެ މަޝްރޫޢުގެ ނިމުން ފާހަގަކޮށް ދިވެހި ސަރުކާރާއި ހަވާލުކޮށްފައި ވަނީ، އިންޑިއާއަށް ރައީސުލްޖުމްހޫރިއްޔާ ކުރައްވަމުންގެންދަވާ ރަސްމީ ދަތުރުފުޅުގެ ތެރެއިން، މިއަދު ދެޤައުމުގެ މެދުގައި ބޭއްވި ރަސްމީ މަޝްވަރާތަކަށްފަހުގައި، ދެޤައުމުގެ އިސްވެރިންގެ ފަރާތުން ދެއްވި ގުޅިފައިވާ ނޫސްބަޔާނުގެ ކުރިންނެވެ.

މިއަދު ހަވާލުކުރި، 700 ހައުސިންގ ޔުނިޓަކީ، އިންޑިއާގެ ލޯން އެހީގެ ދަށުން ފަހިދިރިއުޅުން ކޯޕަރޭޝަނުން ހުޅުމާލެ ފޭސް 2 ގައި އަޅާފައިވާ ފްލެޓްތަކެވެ. ހަނިމާދޫ އެއާޕޯޓު ތަރައްޤި ކުރުމުގެ މަޝްރޫޢުގެ ދަށުން މިއަދު ނިމުން ފާހަގަކޮށްފައި ވަނީ އެ އެއާޕޯޓުގެ ރަންވޭ ބޮޑުކުރުމުގެ މަޝްރޫޢެވެ. 

މިޕްރޮޖެކްޓްތަކަކީ، ކުރީ ސަރުކާރުގައި އިންޑިއާގެ އެގްޒިމްބޭންކުގެ ލޯނު އެހީގައި ހިންގަން ފެށި މަޝްރޫޢުތަކެކެވެ.