ރައްޔިތުންގެ މަޖިލީހުގެ އައު ދައުރުގެ ޖަލްސާތައް ފެށުން އެއް ހަފްތާއަށް ފަސްކޮށްފިއެވެ.

މަޖިލީހުގެ ރައީސް އަބްދުއްރަހީމް އަބްދުﷲ އެގޮތަށް ނިންމެވިކަން މަޖިލީހުގެ އިދާރާއިން މިހާރު ވަނީ މެމްބަރުންނަށް އަންގާފައެވެ. ބައެއް މެމްބަރުން ވިދާޅުވި ގޮތުގައި ރައްޔިތުންގެ މަޖިލީހުގެ އައު ދައުރުގެ ޖަލްސާތައް ފެށުމަށް، މިހާރު ހަމަޖައްސަވާފައި ވަނީ މިއޮކްޓޯބަރު މަހުގެ 14 ވަނަ ދުވަހެވެ.

ޖަލްސާތައް ފެށުން އެއްހަފްތާއަށް ފަސްކުރުމަށް މަޖިލީހުގެ ރައީސް ނިންމަވާފައި ވަނީ  މަޖިލީހުގެ ތަޅުމުގައި ކުރިޔަށްދާ ޖަލްސާތަކާއި، ކޮމިޓީތައް ލައިވް ބްރޯޑްކާސްޓްކުރުމަށް ވީޑިއޯ ރޫމެއް ޤާއިމްކުރުމުގެ މަސައްކަތް ކުރިޔަށްދާތީ ކަމުގައިވެސް މެމްބަރުން ވިދާޅުވިއެވެ.

ރައްޔިތުންގެ މަޖިލީހުގެ ޖަލްސާތައް މިފަސްކުރީ ރައީސުލްޖުމްހޫރިއްޔާ ޑރ. މުހައްމަދު މުޢިއްޒު އިންޑިއާއަށް މިއަދު ފުރަމާނަ ދަތުރުފުޅެއްގައި ފުރާވަޑައިގެންފައި ވަނިކޮށެވެ. އަދި މަޖިލީހުގެ ޖަލްސާތައް 14 އޮކްޓޯބަރުގަިއ ފަށާއިރު، ރައީސުލްޖުމްހޫރިއްޔާ ރާއްޖެ ވަޑައިގަންނަވާނީ، އޮކްޓޯބަރު މަހުގެ 10 ވަނަ ދުވަހުގައެވެ.

ރައީސުލްޖުމްހޫރިއްޔާގެ ދެކަނބަލުން އިންޑިއާއަށް ކުރައްވާ ފުރަމާނަ ދަތުރުފުޅުގައި، އެދަކަނބަލުންގެ އަރިހުގައި ސަރުކާރުގެ މަތީފަންތީގެ ވަފުދެއް ބައިވެރިވެވަޑައިގަންނަވައެވެ. އޭގެ ތެރޭގައި ރައްޔިތުންގެ މަޖިލީހުގެ ޕީއެންސީގެ ޕާލަމެންޓްރީ ގުރޫޕްގެ ލީޑަރު އިބްރާހީމް ފަލާޙްވެސް ހިމެނިވަޑައިގަންނަވައެވެ.