އާސަހަރާ މިސްކިތާއި، ހިނަވާގެ މަރާމާތުކޮށް އަލުން ހުޅުވުމަށްފަހުގައި އާސަހަރާގައި މިއަދުންފެށިގެން އަލުން މީހުން ވަޅުލަން ފަށައިފިއެވެ.

އާސަހަރާ މިސްކިތާއި ހިނަވާގެ ރަސްމީކޮށް އިއްޔެ ހުޅުއްވައި ދެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒވެ. މިސްކިތް ހުޅުއްވައި ދެއްވުމަށްފަހުގައި އެމިސްކިތުގައި އިއްޔެ ކުރެވުނު ހުކުރު ނަމާދުގައިވެސް ރައީސުލްޖުމްހޫރިއްޔާ ބައިވެރިވެވަޑައިގެންނެވިއެވެ.

މާލޭ ސިޓީގެ މޭޔަރު އާދަމް އާޒިމް އިއްޔެ ވިދާޅުވީ، އާ ސަހަރާގައި ، ޖަނާޒާގެ ކަންތައްތައް ކުރިޔަށް ގެންދެވޭނެ އިންތިޒާމު އިއްޔެއިންފެށިގެން ހަމަޖައްސާފައިވާ ކަމަށެވެ. މިގޮތުން މަރާމާތަށްފަހު އެސަހަރާގައި ފުރަތަމަ މީހަކު ވަޅުލާފައި ވަނީ މިއަދުއެވެ.

މޭޔަރު އާޒިމް ވަނީ އާސަހަރާ މަރާމާރުކުރުމުގައި  އެހީތެރިވެދެއްވި މާލޭ ސިޓީކައުންސިލްގެ އެންމެހާ މެމްބަރުން އަދި މުއައްޒަފުންނަށް ޝުކުރު އަދާކުރައްވާފައެވެ.  އަދި ، އެމަސައްކަތް ނިންމުމަށް އެކި ގޮތްގޮތުން އެހީތެރިވެދެއްވި ބޭފުޅުންގެ ތެރެއިން ޚާއްޞަކޮށް ، އެލިއާ މޯލްޑިވްސް ، އެޕޯލޯ ހޯލްޑިންގްސް އާއި ހައިމަން ކޮންސްޓްރަކްޝަން އަދި ޕްރޯއޭސީއަށް އާޒިމް ޝުކުރު އަދާކުރެއްވިއެވެ.

މިކަމުގެ ސަބަބުން މާލެ ސިޓީގެ އެތައް ރައްޔިތުންނަކަށް ލުއިކަން ލިބި ، ހިތްހަމަޖެހުން ލިބިގެން ދިއުމަކީ ލިބޭ ވަރަށްބޮޑު އުފަލަކާއި ހިތްހަމަ ޖެހުމެއް ކަމަށާއި، ރައްޔިތުންނަށް ޚިދުމަތް ކުރުމަށްޓަކައި ދެއްވި ފުރުޞަތަށްވެސް ޝުކުރު އަދާކުރައްވާ ކަމުގައި މާލޭގެ މޭޔަރު ވިދާޅުވިއެވެ.

މަރާމާތަށް އާސަހަރާ މިސްކިތާއި، ހިނަވާގެ ބަންދު ކުރުމާއި ގުޅިގެން، މާލެ ސަރަހައްދުގައި މަރުވާ މީހުން ވަޅުލަމުން ގެންގޮސްފައި ވަނީ ހުޅުމާލެ ސަހަރާގައެވެ.