ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)ގެ ކުރީގެ ރައީސް ބައްސާމް އަދީލު ޖަލީލު، ހުޅުމާލެއިން ގަނެފައިވާ އެޕާޓްމެންޓްތައް ފުލުހުންގެ ބެލުމުގެ ދަށަށް ނެގުމުގެ މަސައްކަތް ފުލުހުން ފަށައިފިއެވެ. 

ފުލުހުންގެ އިދާރާއިން މީޑިއާތަކަށް ފޮނުވި މެސެޖުގައި ވިދާޅުވީ، މިމަހުގެ 6 ވަނަ ދުވަހުގެ ކުރިން އެ އެެޕާޓްމަންޓްތައް ފުލުހުންނާއި ހަވާލުކުރުމަށް ސެޕްޓެމްބަރު މަހުގެ 28 ވަނަ ދުވަހު ކޯޓުން އަމުރުކޮށްފައިވާ ކަމަށެވެ. އަދި އެ އެޕާޓްމަންޓްތައް ފުލުހުންގެ ބެލުމުގެދަށަށް ގެންދިޔުމުގެ ގޮތުން ކުރަންޖެހޭ މަސައްކަތްތައް ކުރަމުންދާ ކަމުގައި ފުލުހުންގެ އިދާރާއިން ވިދާޅުވިއެވެ.

މި އެޕާޓްމަންޓްތަކަކީ، ބައްސާމް ހުޅުމާލެ އަމީން އެވެނިއުއިން ގަނެފައިވާ ދެ އެޕާޓްމެންޓެވެ. އެއީ ޕެންޓްހައުސްއެއް ގޮތަށް ހުރި ލަގްޒަރީ އެޕާޓްމެންޓްތަކެކެވެ. އެ އެޕާޓްމަންޓްތައް ބައްސާމް ގަނެފައި ވަނީ، ފީފާއިން އެފްއޭއެމްއަށް ދިން ކޯވިޑް ލޯނުގެ 1.9 މިލިއަން ޑޮލަރުގެ ތެރެއިން އެއް މިލިއަން ޑޮލަރު ބޭނުންކޮށްގެންނެވެ. އަދި އެ އެޕާޓްމަންޓްތައް ބައްސާމް ގަނެފައި ވަނީ، 2021 ވަނަ އަހަރުގެ ތެރޭގައެވެ.

ދައުލަތުން ވަނީ ބައްސާމްގެ މައްޗަށް މަނީ ލޯންޑަރިންނާއި ޚިޔާނާތުގެ ދައުވާތައް އުފުލާފައެވެ. އަދި އެ ދައުވާތަކާއި ގުޅިގެން ބައްސާމުގެ ޕާސްޕޯޓުވެސް އޮތީ ހިފަހައްޓާފައެވެ.