ސިޔާސީ ޕާޓީތަކުގެ މެމްބަރުކަމުން ވަކިވުމަށް އޮންލައިންކޮށް ހުށައެޅޭ ގޮތަށް ހަމަޖައްސައިފިއެވެ.

އެކޮމިޝަނުން ވިދާޅުވީ، މިއަދުން ފެށިގެން، ސިޔާސީ ޕާޓީއަކުން ވަކިވުމަށް އެދޭނަމަ my.elections.gov.mv "މައި ޕޯޓަލް" މެދުވެރިކޮށް މި ޚިދުމަތް ފަސޭހަކަމާއެކު އާންމުނަށް ބޭނުންކުރެވޭނެއެވެ. އަދި މިޕޯޓަލް މެދުވެރިކޮށް ހުށަހަޅާ ހުށަހެޅުމެއްގެ އަދާހަމަ ވަގުތުން ފެންނާނެހެން މި ޕޯޓަލް ވަނީ ފަރުމާކޮށްފައި ކަމަށްވެސް އެކޮމިޝަނުން ވިދާޅުވިއެވެ. މީގެ އިތުރުން އެކޮމިޝަނުން ވިދާޅުވީ، "މައި ޕޯޓަލް" މެދުވެރިކޮށް މި ޚިދުމަތް ދޭން ފެށުމާއެކު، މީގެކުރިން ބޭނުންކުރަމުން އައި "ސިޔާސީ ޕާޓީގެ ދަފްތަރަށް ޝަކުވާ ހުށަހަޅާ ފޯމު" ބޭނުންކުރުން ހުއްޓާލައިފައިވާކަމަށެވެ.

މީގެ އިތުރުން، މި ޚިދުމަތްދިނުމަށް ހަމަޖައްސާފައިވަނީ މިހާރުވެސް ސަރުކާރުގެ އެކިއެކި ޚިދުމަތްތަކަށް ބޭނުންކުރާ، އީ-ފާސް މެދުވެރިކޮށްކަމުން، ޕާޓީއަކުން ވަކިވާން އެދި ހުށަހަޅާއިރު އިތުރު ލިޔެކިއުމެއް ބޭނުމެއް ނުވާނެ ކަމަށާއި، މިއީ ރައްޔިތުންނަށް ލުއިފަސޭހަ، އަދި އިތުބާރުކުރެވޭ ނިޒާމެއް ކަމުގައި ކޮމިޝަނުން ވަނީ ވިދާޅުވެފައެވެ.