މިނިސްޓްރީ އޮފް އިސްލާމިކް އެފެއާޒުން އިސްލާމީ މަރުކަޒުގައި އަލަށް މަސްފެންގަނޑެއް ހަދަން ނޫޅޭ ކަމުގައި އިސްލާމިކް މިނިސްޓަރ ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، އެމިނިސްޓްރީ ކުރި އިއުލާނަކާއި ގުޅިގެން ނޫސްތަކުގައި އެވާހަކަތައް ލިޔުމުން އެކްސްގައި ލިޔުއްވި ޕޯސްޓެއްގައެވެ.

އިސްލާމިކް މިނިސްޓްރީން ވަނީ، އެމަރުކަޒުގެ 40 ވަނަ އަހަރީ ދުވަހަށް މުންނާރުގެ ބުޑުގައި މަސްފެންގަނޑެއް ހަދަން ބޭނުންވާ ކަމުގައި ހާމަކޮށް އެކަމަށް ބީލަން ހުށައެޅުމަށް ހުޅުވާލާފައެވެ. އެހެން ނަމަވެސް އިސްލާމީ މަރުކަޒުގެ މުންނާރު ބުޑުގައި އޮންނަ ފެންގަނޑަކީ ވަރަށް ކުރިއްސުރެ އެތަނުގައި ހަދާފައި އޮންނަ، އަދި ފަހުން ނުބަލަހައްޓައި ދޫކޮށްލާފައި އޮތް ތަނެކެވެ. މިނިސްޓަރ ޝަހީމް ވިދާޅުވީ، ރާއްޖޭގެ އިޤުތިޞާދީ ހާލަތަށް ރިޢާޔަތްކޮށް އެފަދަ ކަންކަން ކުރުން ރަނގަޅުކަމަށް ނުފެންނާތީ އިސްލާމިކް މިނިސްޓްރީން ކުރި އިޢުލާނު ބާޠިލްކުރުމަށް އަންގަވާފައި ވާކަމަށެވެ.

އޭގެ ފަހުން އެކަމާއި ގުޅޭ ގޮތުން މިނިސްޓަރ ޑރ. ޝަހީމް ކުރެއްވި ދެވަނަ ޕޯސްޓުގައި ވިދާޅުވީ، އިސްލާމީ މަރުކަޒުގެ މުންނާރު ބުޑުގެ ވަށައިގެން ހަދާފައި އޮންނަ ފެންގަނޑަކީ، މަރުކަޒު ހެދީއްސުރެ އޮންނަ ފެންގަނޑެއް ކަމަށާއި، މިނިސްޓްރީން އުޅުނީ އެތަން ހަލާކުވެފައި އޮތީމާ އެތަން މަރާމާތު ކުރުމުގެ މަސައްކަތް ފަށަށް ކަމަށެވެ. އަދި ނޫސްތަކުގައި ޚަބަރު ފަތުރާފައިވާ ގޮތަށް، އަލަށް އެތަނުގައި މަސްފެންގަނޑެއް ހަދަން އުޅެނީ ނޫންކަމުގައި ވެސް މިނިސްޓަރ ޑރ. ޝަހީމް ވިދާޅުވިއެވެ.