ކުރީގެ ޑިފެންސް މިނިސްޓަރ އަމީން ފައިސަލާއި، ދިވެހިރާއްޖެއިން އިނގިރޭސި ވިލާތަށް ކަނޑައަޅުއްވާފައި ހުންނެވި ކުރީގެ ސަފީރު ފަރަހަނާޒް ފައިސަލްގެ ބައްޕާފުޅު، ޢަބްދުލްމަޖީދު މާހިރު އަވަހާރަވެއްޖެއެވެ.

ޢަބްދުލްމަޖީދު މާހިރަކީ ކުރީގެ ރައީސް އިބްރާހިމް ނާޞިރުގެ ބޮޑު ބޭބޭފުޅެވެ. އިބްރާހިމް ނާސިރުގެ ވެރިކަމުގައި މަހްކަމަތުލް އަމަން އާންމުގެ ވެރިޔާގެ ނައިބުގެ މަގާމު އޭނާ ފުރުއްވިއެވެ. މީގެ އިތުރުން މާލޭ މުނިސިޕަލް ކައުންސިލްގެ ރައީސްކަމުގެ އިތުރަށް، ސަރުކާރުގެ އެކި އިދާރާތަކުގައި އިސް މަޤާމުތަކެއްވެސް އޭނާ ފުރުއްވާފައިވެއެވެ.

ދިވެހި ބޭސްވެރިކަމާއި ތާރީޚަށްވެސް ގިނަ ޚިދުމަތްތަކެއްކޮށްދެއްވި ޢަބްދުލްމަޖީދު މާހިރަކީ އެ ރޮނގުން ފޮތްތައްވެސް ލިޔުއްވާފައިވާ ބޭފުޅެކެވެ. 

ޢަބްދުލްމަޖީދު މާހިރު އަވަހާރަވުމާއި ގުޅިގެން ރައީސުލްޖުމްހޫރިއްޔާވެސް ވަނީ އެ އާއިލާއަށް ތަޢުޒިޔާ ވިދާޅުވެފައެވެ. ރައީސުލްޖުމްހޫރިއްޔާގެ ތަޢުޒިޔާގެ މެސެޖުގައި، ޢަބްދުލްމަޖީދު މާހިރު އަވަހާރަވި ޚަބަރު އެއްސެވީ ފުން ހިތާމައާއެކުގައިކަން ފާހަގަކުރައްވާފައި ވެއެވެ.

މީގެ އިތުރުން، މަރްޙޫމު މާހިރަކީ ދިވެހި ބޭސްވެރި ޙަކީމެއްގެ އިތުރުން ދިވެހި ތާރީޚާއި އާދަކާދައިގެ އެތައް މަޢުލޫމާތެއް މިއަދުގެ ޖީލަށް އޮޅުންފިލުއްވައިދެއްވި އުސްތާޛެއްކަމާއި ޤައުމަށް ޚިދުމަތްތެރި ޢިލްމީ ޤާބިލް ދަރީންތަކެއް ތަރުބިއްޔަތުކުރެއްވި އަގުހުރި ބައްޕައެއްކަން ރައީސުލްޖުމްހޫރިއްޔާގެ މެސެޖުގައި ފާހަގަކުރައްވާފައިވެއެވެ.

މީގެ އިތުރުން އެމްޑީޕީގެ ކުރީގެ ރައީސް މުޙައްމަދު ނަޝީދާއި އެމްޑީޕީގެ އިސް މަޤާމުތަކުގައި ތިއްބެވި ބޭފުޅުންވެސް ވަނީ އެއާއިލާއަށް ތަޢުޒިޔާ ފޮނުއްވާފައެވެ.

ޢަބްދުލްމަޖީދު މާހިރު އަވަހާރަވި އިރު އުމުރުފުޅަކީ 96 އަހަރުފުޅެވެ.

އަލްމަރްހޫމް ޢަބްދުލްމަޖީދު މާހިރުގެ މޫނު ދެއްކުމާއި ކަށު ނަމާދުކުރުން އޮންނާނީ އިސްލާމީ މަރުކަޒުގައެވެ. ކަށު ނަމާދު ކުރުން އޮންނާނީ މިރޭގެ، ޢިޝާނަމާދަށް ފަހުގައި، މަސްޖިދުއްސުލްޠާން މުޙައްމަދުތަކުރުފާނުލްއަޢުޡަމްގައެވެ. ޖަނާޒާ އޮންނާނީ ގަލޮޅު ޤަބުރުސްޠާނުގައެވެ.