ހިޒްބުﷲ އާއި ދެކޮޅަށް ހަނގުރާމަ ކުރުމަށް އެއްގަމު މަގުން ލުބުނާނަށް ވަތް އިޒްރާއީލު ސިފައިންގެ 8 މީހުން މަރާލައިފިއެވެ.

ދެކުނު ލުބުނާނަށް ވަތް އިޒްރާއީލު ސިފައިންގެ 8  މީހުން މަރުވެ އިތުރު ސިފައިންތަކެއް ޒަޚަމްވެފައިވާކަން އިސްރާއީލު އަސްކަރިއްޔާއިންވެސް ވަނީ ކަށަވަރުކޮށްދީފައެވެ. މަރުވި ސިފައިންގެ ތެރޭގައި ހިމެނެނީ އުމުރުން 23 އަހަރާއި 20 އަހަރާއި ދެމެދުގެ ޒުވާނުންނެވެ. އެމީހުންގެ ތެރޭގައި، ކެޕްޓަން ރޭންކުގެ ސިފައިންނާއި، ސާޖަންޓް މޭޖާ އަދި ސާޖަންޓް ރޭންކުގެ ސިފައިން ހިމެނެއެވެ.

ހިޒްބުﷲގެ ލީޑަރު ޙަސަން ނަސްރުﷲ ޝަހީދުކޮށްލުމަށްފަހުގައި އިޒްރާއީލުން ވަނީ އެއްގަމު މަގުން ލުބުނާނަން ވަންނަން ފަށާފައެވެ. އެހެން ނަމަވެސް ހިޒްބުﷲގެ ގެރިއްލާ ހަނގުރާމަވެރިންނާއި ދެކޮޅަށް ހަނގުރާމަ ކުރާނޭ ޤާބިލްކަމެއް އިޒްރާއީލުގެ އަސްކަރިއްޔާގައި ނުހުންނާނޭ ކަމުގައި ހިޒްބުﷲ އިން ވަނީ ބުނެފައެވެ.

އަންގާރަ ދުވަހުގެރޭ އީރާނުންވެސް ވަނީ އިޒްރޭލަށް ބެލެސްޓިކް މިސައިލުން ހަމަލާތައް ދީފައެވެ. އެހަމަލާތަކުގައި އިޒްރާއީލުގެ ތިން އެއާބޭސްއެއް ވަނީ ހަލާކުކޮށްލާފައެވެ.