ދުނިޔޭގެ ޖަނަވާރު ދުވަސް ފާހަގަކުރުމުގެ ގޮތުން ޚާއްޞަ ހަރަކާތްތަކެއް ހިންގުމަށް ނިންމާފައިވާ ކަމުގައި މިނިސްޓްރީ އޮފް އެގްރިކަލްޗަރ އެންޑް އެނިމަލް ވެލްފެއާ އިން ބުނެފިއެވެ.

އެމިނިސްޓްރީން ހާމަކޮށްފައިވާ ގޮތުގައި، ދުނިޔޭގެ ޖަނަވާރު ދުވަސް ފާހަގަކުރުމުގެ ގޮތުން ހަރަކާތްތައް ކުރިޔަށް ގެންދިޔުމަށް ހަމަޖައްސާފައި ވަނީ އާޓިފިޝަލް ބީޗުގައެވެ. މިގޮތުން މިއަދު ހަވީރު، 4:00 އިން ފެށިގެން ރޭ ގަނޑު 11:00 އާއި ހަމައަށް ދުވަހާއި ގުޅޭ ޚާއްޞަ ފެއާއެއް  ކުރިޔަށްދާނެ ކަމުގައި، މިނިސްޓްރީން ވަނީ ހާމަކޮށްފައެވެ.

މިއީ ދުނިޔޭގެ ޖަނަވާރު ދުވަސް ރާއްޖޭގައި ފާހަގަކުރާ ފުރަތަމަ ފަހަރެވެ. ދުވަސް ފާހަގަ ކުރަނީ ކޮންމެ އަހަރެއްގެވެސް އޮކްޓޫބަރު މަހުގެ 4 ވަނަ ދުވަހުގައެވެ.

ދުނިޔޭގައި ޖަނަވާރުގެ ދުވަހެއް އެންމެ ފުރަތަމަ ފާހަގަކޮށްފައިވަނީ، މާރިޗު 24، 1925ގައި، ޖަރުމަނުގެ ވެރިރަށް ބަރލިންގައެވެ.