ރާއްޖެއަށް ދިމާވެފައިވާ ޑޮލަރުގެ ދަތިކަން ހައްލުކުރުމަށް އެމްއެމްއޭގެ ޤަވާއިދުތަކަށް ބަދަލު ގެނެސް އަޅަން ނިންމި ފިޔަވަޅުތަކާއި މެދު ރިސޯޓު ވިޔަފާރިވެރިންގެ ޖަމިއްޔާ މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީސް (މަޓީ)އިން ކަންބޮޑުވުން ފާޅުކޮށްފިއެެވެ.

މަޓީން ކަންބޮޑުވުން ފާޅުކޮށް ނެރެފައިވާ ބަޔާނުގައި ބުނެފައި ވަނީ، އެމްއެމްއޭގެ ޤަވާއިދުތަކަށް ބަދަލު ގެނެސްފައި ވަނީ، އެ ޖަމިއްޔާއާ އެކުގައި އެމްއެމްއޭއިން ބޭއްވި މަޝްވަރާތަކުގައި ފާހަގަކުރި ކަންކަމަށް އިޖާބަ ދިނުމެއް ނެތި ކަމަށެވެ. 

މަޓީގެ ބަޔާނުގައި ބުނެފައި ވަނި، ބޭރު ފައިސާ އާއި ބެހޭ އާ ގަވާއިދުގައި ހިމެނުއްވުމަށް އެ އޮތޯރިޓީން ހުށަހަޅުއްވާފައިވާ ހުށަހެޅުންތަކަކީ, މި ޖަމިއްޔާއަށް އެއްބަސްވެވޭނެ ކަންތައްތަކެއް ނޫން ކަމުގައި ކަމުގައި އެޖަމިއްޔާއިން އެމްއެމްއޭގެ ވެރިންނަށް ދަންނަވާފައިވާ ވާނެ ކަމަށެވެ. އަދި އެމްއެމްއޭގެ އައު ޤަވާއިދުގައި ހުރި ކަންބޮޑުވުންތައް އެޖަމިއްޔާއިން ފާހަގަކުރި ކަމަށާއި އެހެން ނަމަވެސް އެކަންކަމަށް އެމްއެމްއޭއިން އިޖާބަދީފައި ނުވާކަމުގައި މަޓީގެ ބަޔާނުގައި ވަނީ ބުނެފައެވެ.

އިއްޔެ އާއްމުކުރި އައު ޤަވާއިދުގައި ބަޔާންކޮށްފައިވާ ގޮތުން ރިސޯޓުތަކަށް އަންނަ ފަތުރުވެރިންގެ ތެރެއިން ބޮލަކަށް 500 ޑޮލަރު، އަދި ގެސްޓް ހައުސްތަކަށް އަންނަ ފަތުރުވެރިންގެ ތެރެއިން ބޮލަކަށް 25 ޑޮލަރުގެ މަގުން ރާއްޖޭގެ ބޭންކިން ނިޒާމްގެ ތެރެއިން ފައިސާ މާރު ކުރަންޖެހެއެވެ. އަދި އައު ޤަވާއިދާއިއެކު މަނީ އެކްސްޗޭންޖުގެ ލައިސަންސް ދިނުމަށްވެސް ނިންމަވާފައި ވަނީ ދިވެހި ފަރާތްތަކަށް އެކަންޏެވެ.