އީރާނުން މިރޭ އިޒްރާއީލަށް ބެލެސްޓިކް މިސައިލުން ހަމަލާދީ، އިޒްރޭލުގެ އަސްކަރިއްޔާގެ ނަވަތިމް އެއާބޭސް ހަލާކުކޮށްލައިފިއެވެ.

ނަވަތިމް އެއާ ބޭސްއަކީ، އިޒްރޭލު އަސްކަރިއްޔާގެ ބޮންއަޅާ މަތިންދާ ބޯޓުތައް އުދުއްސާ އެއަރބޭސް އެވެ. ރިޕޯޓްތައް ބުނާ ގޮތުގައި އެ އެއާބޭސްގައި އޮތް އިޒްރޭލު އަސްކަރިއްޔާގެ ބޮންއަޅާ މަތިންދާ ބޯޓުތަކުގެ ތެރެއިން، ވިއްސަށްވުރެ ގިނަ ބޯޓު ވަނީ ހަލާކުކޮށްލާފައެވެ. އެ ބޯޓުތަކުގައި ފަސްވަނަ ޖީލުގެ އެފް-35 ގެ ފައިޓަރޖެޓްތަކެކެވެ.
ނަވަތިމް އެއާބޭސްއަކީ ތެލްއަވީވާއި ކައިރީގައި އޮންނަ އެއާބޭސްއެކެވެ. އިރާނުން ދިން ހަމަލާތައް އިޒްރޭލުގެ ޖާސޫސީ އިދާރާ މޮސާޑަށްވެސް އަމާޒު ކުރި އިރު، މެޑިޓެރޭނިއަން ކަނޑުގައި ހުރި އިޒްރޭލުން ގޭސް ނަގާ ޕްލެޓްފޯމެއްވެސް ވަނީ ހަލާކުވެފައެވެ.

އިޒްރޭލަށް އީރާނުން މިރޭ ދިން ހަމަލާތައް އަމާޒުކޮށްފައި ވަނީ އިޒްރޭލުގެ އަސްކަރީ އަމާޒުތަކަށެވެ. އިރާނުންދިން ހަމަލާގައި އިޒްރާއީލުން އެއްވެސް މީހަކު މަރެއް ނުވެއެވެ. އެހެން ނަމަވެސް އީރާނުގެ މިސައިލްތައް ހުއްޓުވުމަށް އިޒްރޭލުގެ އަޔަންޑޯމް ސިސްޓަމުން ފޮނުވި މިސައިލެއް އަމާޒުން ކަސިޔާރުވެ ހުޅަނގު އައްސޭރިއަށް ވެއްޓި ފަލަސްޠީނު މީހަކު ވަނީ މަރުވެފައެވެ.

އީރާނުން މިރޭ އިޒްރޭލަށް ހަމަލާ ދިނުމާއި އެކު  އެމެެރިކާ އާއި ޔޫރަޕްގެ ޤައުމުތަކުން ވަނީ އިޒްރޭލާއި އެކު ތިބިކަން ހާމަކޮށްފައެވެ. އަދި ހަމަލާތައް ހުއްޓާލުމަށް އދ.ގެ ސެކްރެޓަރީ ޖެނެރަލް އެންޓޯނިއޯ ގުޓަރޭސްވެސް ވަނީ ގޮވާލައްވާފައެވެ.