މިސަރުކާރުގެ ފުރަަތަމަ ފިނޭންސް މިނިސްޓަރު، ޑރ. މުހައްމަދު ޝަފީގު މަޤާމުން އިސްތިއުފާދެއްވައިފިއެވެ.

ރައީސުލްޖުމްހޫރިއްޔާގެ އޮފީހުން ވަނީ މީގެ ކުޑަ އިރުކޮޅެއް ކުރިން އެކަން ހާމަކުރައްވާފައެވެ.

ވަޒީރުންގެ މަޖިލީހުގެ ބައްދަލުވުންތަކަށް ބަލާއިރު، ފާއިތުވި ދޮޅުމަސްދުވަހުގެ ތެރޭގައި ބޭއްވި ވަޒީރުންގެ މަޖިލީހުގެ ބައްދަލުވުންތަކުގައި ޑރ. ޝަފީޤު ބައިވެރިވަޑައިނުގަންނަވާކަން ފާހަަގަ ވެފައިވެއެވެ. ސަރުކާރުގެ ފަރާތުން ރަސްމީ ޖަވާބެއް ނުލިބޭތީ، ޑރ. ޝަފީޤު އިސްތިއުފާ ދެއްވި ސަބަބެއް އެނގިފައެއް ނުވެއެވެ.

ރައީސުލްޖުމްހޫރިއްޔާ މިއަދު ވަނީ، ފޮރިން މިނިސްޓަރުގެ މަޤާމުގައި ހުންނެވި، މޫސާ ޒަމީރު، ފިނޭންސް މިނިސްޓްރީއަށް ހަމަޖައްސަވާފައެވެ. އަދި ހުސްވި ފޮރިން މިނިސްޓަރުގެ މަޤާމަށް ހެލްތު މިނިސްޓަރުގެ މަޤާމުގައި ހުންނެވި ޑރ. ޢަބްދުﷲ ޚަލީލު ހަމަޖެއްސެވުމަށް ފަހުގައި،  ހުސްވި ހެލްތު މިނިސްޓަރުގެ މަޤާމަށް ޢައްޔަނު ކުރައްވާފައި ވަނީ ޢަބްދުﷲ ނާޡިމެވެ. 

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުގެ ވަޒީރުންގެ މަޖިލީހުގައި އެމަނިކުފާނާއި އެކު ޖުުމުލަ 24 ބޭފުޅުން ތިއްބަވައެވެ.